رائد الفريجي
توهه روحي اتلمست نسمة هواك
اشبيك با انفاسك جبت حفنه هجر
تكتل بعيني حلم وباليلي ناس
وفوك دم احساسي اجيك اني اعتذر
فدوه كلشي ايروجلك بس لاتروح
اسنين خطواتك وانا ابطرك العمر
يالزرعت بروحي ملكاك وهواك
خضرن بجفاك كافور وسدر
طشرتهه اشموع صفناتي وراك
خاف وحشه بليل رسمك من يمر
بذن ليلك علكت ترجيه طيف
لم ضواه كله وكعد بيهه الفجر
الجروح اتموت من ايمرهه عيد
وتكشخ الدمعات بهدوم العذر
يالربن خطواتي بدروبك تعال
جدمي تايه والدرب ماينحزر
وبيد جلماتك ابد لتودي سيف
ايموت جرحك والسوالف تنذكر
بكثر ماشايل ضحكتي بجف هواك
كمت احس بالضحكه يتبده جرح
ادري وحشه وتحلم اتضوك النهار
وقشمريت احلامي وارسمتك صبح
ابين كل دكه كلب زارعلك آه
بيهه حسراتي الخذت دور الفلح
براس صفناتي خيالك حطلي شيب
واني فوك الروح باني اسمك صرح
حتى اذاني وياك صباغهه بحلاك
ايصير طيب لو دخل حجيك رمح
كلشي منك زارعه بروحي حنان
كلشي حتى الدوم منك مايصح
