سلوان المحمداوي

ابهجرك فلا شيبت .. بس شيبت صفنتي
بعديش رديت الي ؟
من بعد ما أيست واستفحلت ذلتي ؟
ما تدري بيه متت .. وجف مدري ياهو اجه شيًع الي اجنازتي ؟؟
الله ايرحمه اسمعت
بس اني بعدك صرت
كلمه ابطرك شفتي ؟
ناديت بيهه وصحت
الله .. يا عشرتك
بيهه السوالف حلم وايعثر ابخطوتي
وبيهه الدمع من يمر سيف ويحز ضحكتي
الله .. لمن امس جيتك ابجفي امل
بي نبره من ونتي ؟
وقطرات من فركتك
بيهن اذكرك ردت واستاحشت عزتي
بس ردت ارجعك ولو ..
نص قطره منك ردت تتفصل لنظرتي
امجودر ضعن فركتك
باني ابخيالي هجر
يبتدي اشما فكرت بيه انتهت رحلتي
من جنت اشوفك تجي
افرش ادروبك عشك
وارسم احلامي وهم
واستانس ابلوعتي
وجنت اخجل امن اليمر
سهوآ يذكرك خفت
وايغازل ابشوغتي
من كبًرت فركتك
صليت حبنه قضه ؟؟
ولملمت كل المضه
او وضيتك ابدمعتي ؟؟؟
يتقبل الله الهجر كتلك ولاكن بقه
ذمه ابركبتك حجي ما شايله ابركبتي ؟؟
بعديش رديت الي ….
لمن خذت واهسي
من زغرت ضحكتي
من رهم حزني علي
من كبرت حيرتي
مو آني عفتك لان
لاكيت غيرك سهر
عمره ابعمر غيبتك
بس بي شفت راحتي ؟؟
بعديش رديت الي