ولد الشاعر في محافظة ميسان عام 1962 وانتقل فيما بعد مع عائلته إلى بغداد عاصمة الثقافة ليستقر فيها ..
بدأ شاعرنا الشهيد غني محسن مشواره الشعري في أواخر السبعينيات إلا أن اندفاعه اتضح في منتصف الثمانينيات حيث انضم لمنتدى الشعراء الشباب في بغداد وتأثر بالشاعر الكبير الأستاذ كاظم إسماعيل الكاطع ..
أثار انتباه معظم الشعراء بقصيدة رائعة شاعت في وقتها كان مطلعها ..
انتهه بلحظة الأمل والشوك والهمسه
مثل جنح الفراشة الينتهـــــــي بلمسه
امتاز الشاعر الشهيد غني محسن بزهده وكبريائه وأخلاقه العالية وأدبه الجم ..
عاش حياة متواضعه جدا وكان الفقر والحرمان من أصدقائه ..
له طفل وحيد اسمه مرتضى ..
استشهد بتاريخ 19/6/2007 أثر حادث ارهابي غادر جبان استهدف المواطنين الأبرياء قرب جامع الخلاني في بغداد ..
نماذج من شعره …
ما عندي حمل يتطشر بريح .. أجودر وين ما ذبتني دنياي
يم الناس اضحك ضحك خالين .. بس وحدي من أدّمع أنكلب ناي
***
تعبني العمر كد مانه تعبته
وعطش للنوم جفني أتفطرت شفته
واتعبك يا كلب عالمامش أعمي العين
والمامش ولك يا جدم واصلته
كلي شحصلت من صاحبيت الغيم
مدري بيا جزيرة العمر ضيعته
وفي الحفل التأبيني الذي أقيم في بغداد كتب العديد من الشعراء قصائد رثائية للشاعر الشهيد غني محسن البهادلي اخترت بعض الأبيات لكم …
سعد محمد الحسن ..
الدنية كسرت جفي وعضيدي
وبعد ميفيد عض شفتي وعضيدي
شلي بدنياي لو غرّب عضيدي
هذاك الجان من أوكع تجيه
ستار اللامي ..
روحي من أتلوب جنت انه اعتنيك
هسه من اتلوب ألمن اعتني
شلون أطب البيتك وأوصل واجيك
الكه بس تصوير ما الكه غني
حسين الكعبي ..
يلطولك نهر ملتف عليه الهور
أشوفك يا غني ابوحدك قصيدة
نعرف بالقصيدة يصير تنعاد
هم يرجع غني من أنصيح عيده
مهند السيد هاشم …
مو كلمن يموت تموت ذكراه
ولا كلمن يغيب نكول سافر
أكو ميت نعم بس هوه موجود
غايب عنه بس نعتبره حاضر
هينه يموت نور ابوسط العيون
بس صعبة تره أمن يموت شاعر
(قصيدة رحيم المالكي)..
 التي القاها الشاعر سمير صبيح
في  الحفل التأبيني الذي اقام عزاءً على روحيهما الطاهرة..
رحيم المالكي و غني محسن البهادلي
انه ميت شعر واتوسل الشيطان
ياشيطان شعري انكطعت اخبارك
كبل جنك جحا وكلساع تدك الباب
ماريدن شعر مر واخذ مسمارك
ياشيطان شعري الشاعر من يموت
يتعطل فرض والكون يتدارك
انه واثق عفتني روح لارديت
يوم افراك وجهك يوم الامبارك
اشجنيت من الشعر لو سجن لو طعنات
ساعه اصفى وي ربعي وعمر نتعارك
بس لحظات محتاجك كبل متروح
اريد ارثي غني وروح اكطع ابحارك
ياصاحب غني ماعفته حد الموت
وكتب اخر قصيده من وهج نارك
جان القلم شظه والحبر نيران
الشهاده اكبر قصيده اتدوخ افكارك
فنك مثله تكتب تكدر انت تموت
ظل دور اضعاف الكوم تبرالك
غني دور ورق مالكه وماتاناك
كتبها وصعد بيها ومانزل جارك
غني والفقره ظلوا بيهم اشوصيت
غني وصيتمن من ياخذ بثارك
غني كلش غني بس بعده بالايجار
غني ياهو شريف ويدفع ايجارك
يااكبر حرامي وبكت كوم اكلوب
رجع اكلوبنا وبالموت نتشارك