محمد حاكم الطائي
قطار الشوك عده وصرنه عرسان
خلص وكت العشك المن ترجعين
اسم ابنج بأسمي شلون ميجوز
نفس عشكي انه لابنج تعشكين
يم افلان رجعي فشله الاكيج
رجعي انته وجهالج لاتحنين
جنت اعصر عيوني يطيح ملكاج
ومن اعصر جروحي تذب سجاجين
مامديت ادي محتاج للمال
مديت ايدي قصدي وياي ترحين
ابشرنج صرت مرجع للجروح
من اطلع جروحي اسد عين الدكاكين
وعلى كل حايط اسمج اني خطيت
شوفي اسمج تره بروس الدرابين
تعالي انطيج عيني ورجعي البال
بيج اني اسرحت مدري وصلت وين
(تعالي ارد انه اكمل ديني وياج
فشله من الله انه مضيع نصف دين)
يراحت بالي راح البال وياج
ياجرح بطعم غنوه التسعين
شيعت الاحلام بعين عميان
وعلي بس ضحكتج انتي تشيعين
تندمي ارد احس معاشر انسان
يعض عمره واصبعه بفركه الزين
فرق مابين حبي وحبج هواي
مثل فرق الشمر عن حظره حسين
كف يازمن عنه صرنه شياب
كمت اصبغ بشعري وعمري عشرين
تقليدي نتزوج واحنه عشاك
وسفه ايضيع كلشي برمشه العين
ايست بعرس فكيت فركاج
يورده وضعتي مني بنص بساتين
صرت جلمه بحلك علان وفلان
يتربيتي بحضن غيري تنامين
بحضن رجلج ومرتي يخلص اليل
ونمنه اثنينه باحضان ميتين
لدكين كلبي الجان الج بيت
هسه افلانه تفتح من تدكين
