الى اول شهيد شيوعي روى دمه الطاهر أديم العراق (حسن العياش)
محمد علي محيي الدين
يا بيرغ هوانه بزفة العشار
وشوباش الشغيلة بثورة المعقل
يا أول شيوعي الحرض العمال
عالثوره ورسم إضرابها الأول
شيوعي أول ..شهيد أول… فدائي أول
لرسمك فوگ أسوار العراق أهلال
ما بدل ألوانه يوم وتحول
وأغنيك بشعر وأحله الشعر لو چان
بعيون العراق ألصافيه تغزل
هذوله أحنه الشغيلة نغير التاريخ
وأحنه بكل زمان النرفع المشعل
مثل نفط العراق شما تمر أزمان
يبقى الاحتياطي العالمي الأول
حسن واشچم حسن جابن عراقيات
نجيبه أرض العراق بكل وكت تحبل
حسن بالبصرة ثار وسجل التاريخ
شلون تحالف الچاكوچ والمنجل
وأشلون العراقي ما يهزه الضيم
مثل عيط النخل كل ضيم يتحمل
وحسن ذاكه حسن ظل بيرغ الثوار
واسأل بالرشيد شسوه المعدل
عريف وقاد ثوره وگبله أبن عياش
ثار عله المهانة وما قبل ينذل
