عماد المطاريحي

وطن جامع حقيقي الكل الاضداد
طواغيت العصر وأهل العداله
الحجاج عدنه وعدنه الحسين
وعدنه النفط ونعيش البطاله
أنجيب الحرامي أنحطه ناطور
والشاطر نعدّه ويه الكسالى
ولهسه محزمين ونطلب الثار
عمر خلّص نقاتل بالوكاله
الشعوب أنتاجها أنسان وحضارات
 وأحنه أنتاجنه أيتام وثكاله
داخت كلهه داخت ما بقع اشراع
ياقارب النبحر من خلاله
داخ الشعب من كثر المعاناة
والمسؤول داخ من الثماله
وبعض الساسه يصرف موز ووعود
وسوالف عن بطولاته ونضاله
وخطيه البرلماني بدوره محتار
يعوف الدور ويمثل خياله
معارض يشتغل من يوگف السوگ
صدّع روسنه بكثرة جداله
مره يشارك بنقض القوانين
ومره انشوف صولاته وسجاله
ومره يشتغل باليل قناص
ويذبحنه الظهر بسم الرساله
ويملك مافيا وترسانة سلاح
وعله الناس تتفجر رجاله
دخيلك يامحمد ملت الناس
دخيلك ياعلي نريد العداله
ملغومه الشوارع ماكو معبار
واليوصل البيته أله بكفاله
أشباح ملثمه ودّور أرواح
يا منفذ التنفذ من خلاله
طبوا بيت عامل يشتل ورود
باگو ضحكته وگطعو شتاله
وأم ظلت وحيده وتندب الغوث
وشايب منحني محد بقاله
ذبحوا جارنه بدم بارد بليل
ومن كثر الرعب ماتوا أطفاله
وبالجامع عساكر تنشر الخوف
وشايل قاذفه ويهتف بلاله
ونداول السلطه براحه هيهات
هاي وداعتك بيها استحاله
أله نبدل الموروث والثار
والتاريخ والدم والسلاله
ألا الشوك يرجع ينبت ورود
والعاگوله تثمر برتقاله
الكراسي أگبور ساستنه الميامين
محّد قدّم بعمره أستقاله
لذلك قررت راح اشطب الخوف
وأفضح واجهات أهل العماله
ما أقبل بعد كل الخرفات
ولاصافح بعد چف الجهاله
ولاصدّگ بعد تارخي ملغوم
وشك بجدادي ما عدهم بساله
ست الالاف عام من الحضارات
نفدي أرواحنه الراعي الجلاله
ست الالاف عام من الحضارات
حرام على الشعب ياكل حلاله
ست الالاف عام من الحضارات
وأحنه مسودنين وعدنه فاله
ست الالاف عام من الحضارات
واني أطفالي يقرون عله لاله
ست الالاف عام من الحضارت
لا ست الالاف عام من الزباله