كاظم أسماعيل كاطع
كافي منكم
راح اعود العين ماتدمع اذا شافت صوركم
راح اعود الروح
ماتجفل اذا ينجاب اسمكم
راح اوصي الجدم يبعد عن دربكم
كافي منكم
ما امر بكل حديقة
و خاف اشوف الورد واتذكر عطركم
ما اسولف ويه احد
خاف نص السالفة واذكر اسمكم
كافي ضيم الشفته منكم
ياسهركم
ياقهركم
فرني دولاب الليالي
وشالني بروجه حسنكم
وصرت متغرب
وانتم عد اهلكم
كافي مو ظهري ردته
فوك حمل الدنيا ثگلني حملكم
وهم چنت غلطان ,, بيكم
والگلب خليته عدكم
ماحفضتولي الأمانة
وعمري كله ماخنتكم
غيركم ماعندي احد
ثاري غيري هواي عدكم
كافي منكم
كافي منكم
