حسين الحاير 

ازغير بعدك والهوه مو للزغار
تكبر وتعرف شنو معنه الهوه
دام تلعب بيهه ما تعرفهه نار
عنهه لتلومه البعد غير انچوه
اشجابك اعله الفاس يلكلك خضار
لا تعب غصنك ولا متنه انطوه
عوفني ابليلي واخذ مني النهار
الشمعه من كتالهه غير الضوه
كف شراعك وابتعد عن البحار
اشما عله اشراعك تره ايذله الهوه
الحب لليوافون ما خله اعتبار
الزين والمو زين بلحب اكتوه
واني غادرته العشگ من شفته صار
تمره للخاين ولليوفي النوه
لا تخيرني اشيفيد الاختيار
اوجوه وكتي كلهه نفس المحتوه
وردي وجهك وانه اكل وجهي السمار
خاف اظلمك من نعيش الحب سوه
بين لحظه ولحظه اعيش الانكسار
بيدي شمس الله واحس عايز ضوه
اتريد اردلك ؟؟؟ خل يرد خطوه القطار
وخل يرجع كل حلم بيده انطوه..