محمد خشين

ماطاح الوطن بس منطرح تعبان
تعب من الطغات الكلهه غشاشه
وضربت رجل واحد رادو يضربوه
خاطر دمه بين العرب يتلاشه
ومن شالو غطاه اشردو مذعورين
لان شافو {علي} نايم عله فراشه
هذا اقدس وطن ومشرف التاريخ
وي امجاده يعجز خطوه يتماشه
بترابك تغطو انبياء الله
وجم معصوم عمره بطيبتك عاشه؟
بدون ياعراق الدنيه وين تروح ؟
ورده انته وتضيع الدنيه فراشّه
من خاصرتي اطلع حجايتي الوياك
يل ابليلك لهفتي تهيم غباشه
مو مره حلفت وداعتك مرتين
ابمحبتك كلبي ما للموت يتحاشه
غير الدم عرف ماشايف بدنياي
طفل وآنه اعله جتفي تعيش رشاشه
وحزن كل نورس اعله جروف دجله يعيش
وبرائة كل طفل بغداد حاضنته
وسمار وجوهنه الماخوذ منك لون
وملوحة الكاع البيك بس انته
ورفت كل علم بيهه النفس مشدود
ونخل كل الجنوب العاشكك سكته
اليسحكلك طرف ينسحك بالرجلين
زلم عندك ابهمه الموت ساحكته
مانتخله عنك والعشك نهرين
بس ابحاله نكدر والحجه ابذمته
من تلكه السمه متشابكه وي الكاع
نعوفك بس تظل ابكل كلب دكته