محمد حسين

اشم ريحة خيالك من تمر عالبال
بعطر ظلك هدوم الگاع متعطرة
من تخجل خيالك تحمر خدوده
مثل الفحم يخجل ينگلب جمرة
حمار خدود وجهك سحب دم الناس
فقر دمي بسبب وجناتك الحمرة
بوجهك شامة لو ازرعها يطلع ليل
وشجرة كحل چنها اتكحل الفقره
شعرك من تحله الدنيا ظلمة اتصير
وجهك من تديره ايطر عليّ فجره
جمالك لو طلع اطرد عيون الناس
واخاف اهلي يحسدونك على الفطرة
شفاف وترف مرات ماتنشاف
واليشوفك اعذره ايطول النظرة
لمن تبتسم يطلع بوجهك نور
وخدك من اعصره تنگط الگمرة
افرح من اشوف عيونك الحلوات
طفل چني اصير ورايح بسفرة
متعبني واحس بالراحة بس وياك
وعجيبة الكلب يفرح لمن اتقهره
تدلل علي واعنادك امحليك
هادئ كلشي بيك وكح بالنظرة
جلد بيتي يكزبر لمن انت اتفوت
بسبب نظراتك الحيطان متفطرة
ملامح وجه صوتك احلى من العيد
البلبل من يسمعه ايجر الف حسرة
وكلامك من يجيني جروحي كلها اتنام
وصوتك لو وگف اگعد بفي عطره
نهر جنك حبيبي اتبلل بملكاك
واغرك لون طولك لامست خصره
الورد ما خذ عطر من ريحة انفاسك
ولبست الشجر من روحك الخضره
چفك من يريد ايصافح الاشجار
الچف ايدك تمد اغصانها الشجرة
شاغل كلشي بيه ولحظة ما ناسيك
واذا انساك ثق من روحي اتبره
ولو فكرة تجيني وانا مو بيها
امد براسي چفي واعدم الفكرة
وجهك اني اشوفه بچفي من ادعي
بسبب حبك دعاء هواي كمت اقره
من اتغيب عني وچني جاي انساك
ارفع چفي وادعي ووجهك اتذكره
(يا أجمل بشر) يا احلى كل الناس
جمال الكون بيك الباري مختصره
وصفك مو سهل كل شهر اكتب بيت
واعذرني القصيدة انتهت متأخرة