كاظم ال جابر السماوي
مسرحية دم الدخان
قاعه ومسرح بلاسور
وعيون اليشوف أگبور
وستار العين طاح وبّين المكشوف
وبده المشهد الاول من طلع آشور!
شاف الموت صفنه ويكف بيها البوم
والوادم سكارى ويضحك الناطور!
گله شبيك صافن والجفن منفوخ
لاتصفن
اذا شفت الجرح ماينزف ايدخن
تره العطابه چذبه أتمازح المجروح
لان طبع الألم من يصفن ايسكن
من شفت السچچ ماتحمل اليمشون
خاف الگاع تشتم دمعة أليبچن؟
بچه الناطور يمه وصاح يااشور. ياآشور
هم معذور؟
هم معذور؟
ذاك العاف سيفه بكربله مكسور؟؟
ضحك آشور ودموعه بضحكهه تفور
أنا التاريخ كله وعدنه أول طين
كتبنه اعليه مسلة حمورابي وصرخ بينه النور
وعدنه اول حرف والدنيا عميه اعيون
وعدنه اول حظاره وعدنه اول طور
صاح آنه العراق وآنه ابو التاريخ
ودنگ مستحه الها وصفگ الجمهور
تصفيق تصفيق تصفيق تصفيق
بلاتصفيق صاح وشال راسه الفوگ
بلاتصفيق ارجوكم.
اخافن لايسمعوكم
تره الارهاب كتر الباب
خلو المسرح ارجوكم سكوت ايصير.
بس احنه النسولف والكم التعبير
گعد والمشهد اتوضح بعد أكثر
هسه السيف يحچي ويسمع المنحر
وگام يصيح
سكته الريح
وبده الدخان الاسود وانطفه المجمر
ألحوار الان بين اثنين
بس السيف بالسانين
صاح وفزز الميتين لاتنسن
بعد تلهم بشر وتلوچكم كل گاع
وبعين اليتيمه الضحكن ايصفگن
ليش ألراس من يوگع يتچيني
يريد ابچي عليه بس مايبچيني
وأذا دم اليصلي أيونْ
والكافر اجه ايوذن
صار اليبچي يضحك والضحك مجنون
وعيون اليتامه من الضحك يبچن
مامش ماي طاهر يغسل المذبوح؟
ليش اجروح گامت تغسللها اجروح
صفنه وبيّن اليمه
صرخ والمنحر بدمه
مثل دم الحسين الفزز الظلمه
أنه ونهرين نفس الشي
گوم أسال ولك اشور
تاريخ العراق أنحور
تاريخ العراق أنحور
المشهد الثاني
أنشال الستار المشهد الثاني
والجمهور بدموع وعزه امتاني
مگابر والبواچي وصفنة الجمهور
يكف البوم بيها ويخنس المذعور
ياآشور
ياآشور
وابن ازياد يشرب لو بچه الناطور
ركضن وانطفه المسرح
والساتر دمه امسبح
بگت بس وحده ام شيلهه
طفل ميت تلوليله
تسولفله وتناغيله
ييمه الموت جسني بسيفه من جاسك
من جابك اليه الموت چا هلبت يرد راسك
بچه الجمهور ويصفگ
والتصفيق جغ ودك
گضه المشهد بلف حسره
وكل عين البچت حمره
المشهد الثالث
صوت ايصيح من ابعيد
ياثوب الحسين البايكك شيريد
ياثوب الحسين الجرد موجود
يتغاوه ويلبسه بعلوة الفرهود
ماعرگت گصصنه ولامسحنه الدن
ولاگلب انكسر وخيولك انهدن
يلصوتك اله وكفرت الكل بيك
وبيبان الشفاعه اعليهم انسدن
مثلك والذبح نفس الذبح يحسين
وسيوف الخوارج بينه تتفنن
سيف العرب واحد والرگاب اشكال
واليشرب دمه المذبوح يتلّون
شالتنه الليالي وصفر بينه الريح
والرايات بچفوف العجم وجن
ياثوب الحسين وهذا نفس الثوب
من جلد العراق انباگ وتعرين
صاح وطاح
كل عز راح
طلع من المنصه ومشهد اتحول
يتامه بساحة التحرير تتسول
شايب عنده بسطه وبيها يتجول
جسر صافن على اليمشون
ذوله الياكتر يرحون
عمي اهنا يلتمشون
هذا الماي ناشف ماكو بي گطره
قطار الموت اجه ومتعني للبصره
لحظه وصاح هذا انه
منو انته واجيت اتصيح
اسكت لانخلنه ايطيح
صاح انه الاجل والتيه ادروبه
نسه الكفار اجاكم يغسل اذنوبه
عطش والموت من يعطش
يريد ايفيض احبوبه
لان دمكم عذب والكل يشربونه
لان دمكم كريم يفيض ماعونه
صاحو صوت واحد والصياح اتراب
ينفخ ويل وعيون التشوف انياب
اطلع روح سد الباب
اطلع مانريد ارهاب
اطلع مانريد ارهاب
لازم نقضي عالارهاب
هارون الرشيد اهناك يتنانه
نرد عصر الذهب ونحني بيبانه
خبزنه اسمر يظل من لون طينتنه
نذب ثوب الحزن ونعلي هامتنه
عراق الوطن مبحر والهوى اشراعه
عراق المايبدل ناسنه وگاعه
شعب واحد
شعب واحد
ونسد الستار وضجت القاعه
