مصطفى الخزاعي

 بعدهه تگمر اعيوني عله ارسومك… ..نده يفلان
وبعدهه تسافر اظنوني بسمه شباچك الصاحي عتب سهران…
وبعدهه الريح كلما تصفن اعله النار يتفرزن حجي الدخان..
وتفز بيّه سواجي الخوف!! بمرورة سكتي الطرزاهه اصياح..
ويخظّر صوتك بروحي صدى وحيطان…
من ترسم ضواهه الگمره عالشباچ تكسر وحشة الحيطان!!!
واشمك ريحه بيضه بلون نية الله….
واعرف نيّتك وياي… واتكسر عله اشبابيچ عينك ماي!!!
واشوف اوجوه حارگهه سمار شموس رغم الطيف كله افياي…
ويتبده الحلم وتلمّه جربة نوم!!!!! عله الوهواس اغفه وانوي نيّة راي…
باجر لومشيت وياي… كلي ابرد والاگيك بگلب بي ماي..
وانده سنبل ايامي…… واحصدلك سنه من اصباي..
باچر لومشيت وياي… بساتين الشمس باچر تفيض فياي،،
وتخظر للعطش نهران… وتطگ للنوم كومه اغصان!! يمن حلمك تشده اعنان وتجيس البعيد بسفرة اطيوفك!!
واشوف الروح تتبده ويه حادور الضوه اليمتد عله زلوفك،،
ويلملمني الدفو بطاريك وتطشر غناوي بموگد چفوفك!!
وتفز بيه مناره مگذّله بطاريك… صلّت مستحاك وكبّرت خوفك،،،
واصيحن يانهر يمراية الگمره!!!!!
بعدني اغرگ نده بشوفك..
واعرفك يانهر يالطولك اولايات بس المنچوي يطوفك