منتظر الساعدي
تعبان وبس بينه تسولف
تنسه همومك من نرتاح
گلبك يوكع من نتعثر
واسم الله تصيح اعله الطاح
كون ادم شايف حنيتك
چا ما فكر بالتفاح
يل ماخذ ثلثين من امي
مو مرتك ﻻ خالك جنهه
يل شايل طيبه وحنيه
وما خيبت الوادم ظنهه
رادوك تطيح شكد حفرو
بس تعبرهه بجلمه فنهه
انته الصعبات من تمرلك
تصيح ﻻ ماكو اسهل منهه
حاير بيك انته المو شاعر
جلماتك اشوفك وازنهه
وسواليفك كلش حلوه
وكد ما حلوه نكلك عيد
وكعداتك يمنه نحس عيد
وحته العيد يعيد العيد
يا كشخه ديوان الديره
وبيك تباهو ذاك اليوم
كالوا ما ينسى اليتذكره
ويسهل امر المظلوم
ردنه نعد شويه اوصافك
بس محد حاسب النجوم
