عبـد الله الطلـيباوي

من زفوك ياوجه الياس گلي
 بياوجه رضوك وين الگاك يلماشي وجه عريس
لو ترهم مشيت وياك
يلمفارگ نده وفراش هناك يجوز
تحلم توصلك غيمه يا اول ورده زفوها الحضن هيمه
ذاك انته المشيت ويا چتف مالايگ الچتفك
خشن يفلان چف الغير وتوسط حضن چفك
وراك شگد صحت ووميت
حلو صوت الهلاهل كون يتغنه بلحن صايح
وشرديت من رديت
بس عيون غرگانه وحلم طافح
يلون وباگه وجه الشط ولك كل ما اريد
انسه يتراوالي درب باثار خطوت
زفتك امشط
دورلي عذر لناس شتعذر
عرفوني وجه ميت گبل لحظات
لگو بيه جذع مكسور
بس بي ورگ بعده اخظر
بعدك مو مسافت گاع وبعين الدروب خيوط
بعدك روح عافت روح ودعتك سفر ناگوط
المسافه هواي مابين الچتف ولعين
سفر دورت وجه زعلان
بيها شچم امل تايه وموعد ضاع
سفر بي الدموع امتاع
بعد كل هاذ ماريد الملگه وياك
ملگه الرايه وي جيت الريح اوداع
يلزفوك اله البس مثل ثوبك
وله امشي وتچوتي ذراع
وسافر لچن مو عريس
مو تدري الچفن هم ثوب
لاخر سفره فوگ الگاع
تعبت هواي من دونك
ولاعندي مجال ارتاح
خطواتي بمسيرك ماي
حچي العفته كسر مگفاي
چنت تزعل علي بهداي
تذكر من تجي زعلان
تشبخ خاطري وتحچي ثگيله وياي
گبل عدنه امنيات صغار
صغار كبرن ويه جيت الشيب
بس هم گلنه ميخالف
چنت خايف يصير فراگ
من العرس ماخايف
حفل عرسك مشت بي ناس فرحانين
ونا بنفسي بحفل تابوتي ماواگف
الله وياك يلرايح تخلص
هم تجيني هناك وتلگاك
اگلك كله الك طايح
هيمه ولاحصل بيه سوه نبات
اچفوف الحزن ضمني سوه نبات
چنه بير انا ويوسف سوه نبات
طلع يوسف ومادلاش بيه