للراحل: سعد محمد الحسن

يل مالك جذر لا تزعل وي الريح
خافنك بهوية وتنشلع سكته
طيح على الهوه وحب ايده من يختاض
خاوي انت وبعد وما بيك كل عته
علي تضحك يا خايب وانه علو الغيم
على ادموع الفرح هم تضحك النكته
يابو اجناح الشمع متعلي وين اتريد
تدك باب الشمس جنك غشيم انت
ويا بو سنون الخشب لا تعض جف النار
طفي اسنين الخشب لو هفة وكته
ويابو زنود الرمل لتلاوي زند السيل
وعناكيد الصخر كبلك غدن تحته
على ماي الضحل يتونس التمساح
ويفرح بالوحل لمن يمد خشته
وعلى موت الشمس يتنومس الخفاش
وعلى الهندس هدومه عيب ماخذته
طميع الاخطبوط وعنده مية ذراع
ولجن وكت المزامط ماله الجفلته
المبرد صح خشن وناعم خدود السيف
لجن ياهو الركاب انشكلت ابذمته
يابو درزن وجوه استهلكن بالسوم
وعلى باب الخجل اخر وجه عفته
بعد مالك عيون وتنكسر باللوم
ولا عندك وجي حتى اتعرك كصته
صحيح انت ضخم بس مو ضخامة روح
ضخامة كركدن بلوه ابتله ابجثته
الكمكم صح جبير ودلته لاذت بيه
لجن غصبن يدنك راسه للدلته
وصحيح السيسبان يلوذ بيه الياس
لجن ياهو صواني العرس عزمته
وصحيح الاثه عالي وفيه فوك التين
لجن ياهو الجفوف اتوسلت سلته
وصحيح الجوري نام ابنمت الصفصاف
لجن ياهو الخشوم اتعنت الشمته
دخان المزابل يطم عين الكون
لجن عود البخور الحلفوا ابخته
ود العامري ارهى من ابو الحسنين
لجن ياهو اليلوذ المذنب الكبته
وياهو الضربته اتعادل الصوبين
وياهو اعلة صراط ايعبر ابذمته
الفراش ايطير مفرد والجراد اسراب
لجن ياهو الحدايق تحتفي بلمته
فوك من الخشم متعلي عرش العين
لجن تصرخ دمع لو سمعت ابطكته
مترهي الجبل بس ما تعافه ابيوم
ولا شالت خشمها على السفح قمته
لتغرك سكتي كون خلكي ايطول
البحر يكتل ابصوته ويرهب ابصمته
وليغرك مجانك كون عالي اتصير
اشما يعله النخل ينشف كبل وكته
ولتغرك زنودك كون مفتولات
ابو فاضل سحكها بلا زند تحته
ولتغرك حرثتك كون سهله اتصير
العلاس ابن عمي الما حفض عمته
ابن عمي صدك لاجنة خاله الذيب
اذا ذيب الخال اشتترجه ببن اخته
علي دله الحرامي وجابه نص الليل
اجه وياه ايتختل نمت كل ضنته
على الخيبه تشلبه ضم تواطي السور
وحسباله يحوف ويترس الشمته
وي اول جدم صحت انه ياهم ذول
وي لمضة زمرهن من بهز صبته
استخطيت ابن عمي وادري بيه علاس
محد كالي ابعين الظهر شفته
لا تعتب يكلبي ولا تجثر اللوم
كلمن طينته وكلمن لبن درته
مر يوم الشبح متعدي من ابعيد
وانت بسهم حقدك من بعد صبته
صبته بلا عرف وبلا عداوة وياه
ولمن ما كرب لنه الشبح انت
يا عدوة مرض تنتشر مثل الريح
حتى انت ابد ما سلم من انت