يحيى العلاق

دموعي وسهر ليلي اووكفتي اعلى الباب
امسجلهن عليك جروح فوك جروح
الخزن والنزف والطاب ولماطاب
اشكد جنت احترم لون البراءه البيك
على وجهك خجل متنسي دم اركاب
ماخذ صفحه مني ابكل كتر بالروح
واكلك كلي الك سويلك الف احساب
عفت عالم لهفتي ورحت للمجهول
عالم افتراضي ومهزله والقاب
عارض صورتك( للروعه)ول(فد شي)
شافوها الاصحاب واصدق الاصحاب
كل تعليق احس يطعني طعنة موت
يضغط ريتي اليضغط عليك اعجاب
كتبولك شعر واعترف كله احساس
بس مانوهو ..منقول للسياب
يكلولك حلو .والمر يمر بالريج
المصيبه انته حلو والوصفك لاعاب
نفس الصوره هاي العدي من اسنين
تذكر بالقلم من لبستها احجاب؟
بأيام الدراسه ابجنطتي امخليك
اطب للمدرسه ووياي احسك طاب
تصويرك حفظته ابنص كتاب الدين
ما أمن عليك ابحضن غير اكتاب
اشلون اتكشفت للرايح وللجاي !!
ونا الماكشفت مكفاها للطلاب
واتخيل كلام البيك يتغزلون
الوسائل تختلف والناب نفس الناب
واحد كالك دونك ابد ماعيش
والثاني حلف قبلك بشر ماحاب
ثالث طب عليك ابهيئة المسؤول
شايب مستعين ابصورة ابنه الشاب
دخل ساء الادب وتماده بالموضوع
سحك فوك القيم والشيبه والشياب
واحد كالك ماضكت طعم النوم
وانته اتكول عاشك نحل جسمه وذاب
جنك صدكت بغيابك ايسلون
ذوله امربربين وعاشقين الراب!!
شالو غيبتك ضحكو عليك اهواي
عليك اتراهنو تنجاب ماتنجاب؟
لتعول عليهم كلهم ايلعبون
لعبة مزرعه ومحصولها الجذاب
بس انه الوحيد الفتك بيه الشوك
اسد كوه الجفن وطيوفك ادِّك باب
ماطبلك (بيياهو) حتى ياهو اتكول
ولا انتظرك اتشرف على (الوتساب)
اذا تسأل علي تلكاني ويه الليل
اعيد(ابلسه فاكر) (والهوى غلاب)