كصت بينه السيوف.. وذبح ترس العين
فضوهه المنايا تحوك بالساعات
واحلوك الشوارع تاكل الميتين
شوارعنه حمر صابغهه لون الدم
وسره اعلى الموت شوف اشلون مصطفين
شمتانين
بغداد العروسه اتحولت تابوت
ورجالات الحكومة جنهم معرسين
موفاض الصبر وانتو ولا عالبال
وعلى حب الكراسي صرتو نجارين
شمتانين
اغيوم الحرب تمطر جمر عالناس
وانتم روس تمشي بناس متغطين
شمتانين
حوارات الموائد والسمج مسكوف
وبصحون المصايب احنه متعذبين
تموت اطفال عدنه برهبة البارود
وانتو اطفالكم بالغرب محروسين
بعد بسكم حملنه من الصبر اطنان
وتسجيل الصبر ماينكتب مرتين
لاحت والحلوك اطشرت بالريح
وضاعت من دربهم بأثر زين وشين
تكولون اتفقنه وهي حسبة يوم
جاوينه التوافق كلكم متنكين
ياعمي الجرح مايمض بالمنشار
بس ياذي الخشب من ينشطر نصين
صلوها اعلى قبله الشعب فاضت بيه
بعد هي تلوج بينه الواحد وتسعين
طز بكل سياسه التعبد الدولار
العراق يموت اكعد هز ضميرك زين