صباح الهلالي
بعدنه بحيل الأول مانطخ راس
وجرحنه ايطيب كلما جاسته النار
نخل صرنه يبس من شابكه العوز
كرب خد النخل بس كلبه جمار
انتفض بكماط صبره العمره يومين
يذب ثدي امه غاد ويرضع الثار
لو أيوب يحضر ساعة ويشوف
وعلي جان استحه من صبر الزغار
تكب بضلوعنه وتوصل للعيون
حدهه ويه الرمش وتموت الاسرار
ولك نضحك جذب لو زارنه الضيف
جرحنه بطولنه وما شافه خطار
عراقيين ندبج من يجي الموت
نطك صورة ويه عزرائيل تذكار
