انيس العيساوي

سديت الفراغ العاطفي وياج
ولميت الشتات المر على البال
مشاعر عندي جنهة اطفال وكحين
ولكيتج أم حنينه لهاي الاطفال
تلميهم اذا رادو يطشون
مثل مالمت امي بعينها دموع
وتحطين بدربهم عينج احلام
وتعلكين العمر لايامهه شموع
ياآخر فراشة اتحط على الروح
وشتاخذ رحيق بداخلي ايزيد
كبلج روحي برزخ تشتهي الموت
بس وياج صارت مدري شتريد
أحـــس بغداد روحي ودجلة العيون
وبعد مايشتهن غير المواعيد
شبه بستان كلبي وزارته النار
احترك وطيوره كلهن هاجرنّه
بس لاهسه وين الحمدلله
احس روحي بوجودج جنها جنة
مريت اعله واهس عمري ولكيت
كبلج واهس الايام مكسور
آنه لازم اعرفج من كبل وين
من اول ماكتبت الدار والدور
مااعتقد جيتج صدفة عالروح
احس دزج الرب حل لصدمتي
لوما سوالفج يمكن نبي الله
عيسى الروح ميفزز صفنتي
بيج الكيت روحي التايهة سنين
وبشرت العمر كتله اغفه وارتاح
شفتج كل جرح بيه اختفى ومات
وكل حزن على وجهي بشوفتج طاح
ضحكتج رحمة الله ومن تضحكين
كل صحراء عمري تصير قداح
كآبه البيه دخلت حتى الاحلام
وبراسي الكبلج تركو رماح
تعالي ايدج الآيه وراسي كابوس
مدي ايدج براسي وطلعي الراح