امير المالكي

غيروك وزغرت ابعينـي الحيـاة
ولعبت بجسمي اصابيع الجـروح
لا ولايحتاج تنـكر من اجــيــك
هيه عتبة بابك تأشـرلـي روح
جنت صافي وياك ضنيتك بـريء
وجنت ادوْر عالسعاده ابروحك
وشلون تتلكه الفرح لمن يجيـك
انه هيج اتلكه كل اجروحك
موتت عمري وضحكتي وكلشي جان
ماكو شي عندك يموت الذكريات
وجهك الناعم لبس ثوب الخريف
من يجيني ايذبل اوراق الحياة
كلشي عايش بيه موته ومشيت
جيب تابوتك نشيع الامنيات
بيه طاريك سكن بس هسـه وين
الله يعلم وين طاريك يبات
سكتت اعيونك ملامح للوداع
جني احس نفترك نرجع مستحيل
ونته جيت وكـــون ريتك ما اجيت
عله وجهك جان مرسوم الرحيل
ريح بعدك حرّك بروحي العذاب
غير كون أتعلم اعله افراكك
صوة جدمك اخذ ويــاه الامان
وصرت هيكل بشر محني ابابك
اشكد اصيحك بالحلم تسمعني لا
وحته باحلامي بعد ماصيحك
انه شجره وبيهه اخر وركة ليش
من شفتهه اعناد هبت ريحك
منك ابعيني جرح كـلش جبير
ولأن جارحهه بعد متشوفك
مايفز جفك بعد للملكـه يوم
اتريدني ارجع وين ذيج اجفوفك
رايد اتكلي نهر مو نشفوك
ومالكيتك بس لكيت اجروفك
ليش خنجر شايل ابجفك وجيت
اتعلمت من انطعن بسيوفك