عقيل العرد

وجهك يسولف سكتك
وجهك مأيس مثل سكتة كمر ..
مابيك جلمة
وانه مثلك ..
هم جنت كمرة وتطشرت علمودك نجمة نجمة انت رسموك وخذوك
وانه طشيت العمر كد السما وريحت بالك
خاف لا واحد يرسمه
وخفت امد بالي اعله غيرك
ختلت كل الحزن بالروح شماعة عذر
ومن معزتك شرد اكلك .؟؟ شرد اكلك ؟؟
من صحيت .. اتذكرتهن
سوالفك مو عالسما ولا عالرسايل
والحجي البيناتنه مابي حمام !!!
والمناير والضريح البي حلفنه .. هم طلع مابي امام
واليحبك مو غشيم
جانن ادموعك يجذبن
 والمناديل الخذتهن من اصابيعي حرام
سافرت بيك اعله نيتي
جنت اظنن كَلبك بكبر الدرب
وخفت منك ..من نشف جنحك تسافر للعب وتعوف كلشي
والحزن سكتاوي يلبد بالكَلب
حيرتك عبرِة ضباب
لاعشك روحي انتهى وسديت بابي
ولا نسيانك بدى
انه عش كبرن طيوره
وجحَل بحضنه الندى
روحي ساعة بيت مهجور وتدك .. ماتدري المن ؟
وانت باب بلايه نثيه ترش عتبتك … مدري المن ؟
من طحت بسلالي جتفني ضميري
والحرير الغطة عنكَودك حرمني
واعله ريجي مدري جم بلبل نشدته وما حجالي ضكتك ابالي..وحلفتلهم حلو
وجهك اليشبه الماي
يغسل اعيون وخواطر ..
وگلبگ المابي سگف
شبهني حيل
مسولفينك عود ؟ لا  ما شايفينك
لذتك مثل السهر محد عرفها
اني باول ليله من رمشك غفيت
وجفنك بجرة قلم شبعني ليل …
عينك اخر ليله من الدنيا مابيها كمر
وعيني  جدحة ذيب واكثر
خايفه وينخاف منها
وانت نفسك تمشي بيه
 لا حجايه تردلي روحي
ولا حجايه تلولي
گلبي ويندفن ذاك السهر
اثنينه متيهين اهلنا
لهفتي اغنية معيبر
وعشرتك سكتته نهر