جمال الازبجي

صعبة اترد كزاز وصافي مثل الماي
كزاز بطيحتك شتعــــدل الصورة
ألزك بيك كــوه من الصبح لليل
وأحس من الخدش عشرتنه مبتورة
ماترهم اكلك لوله ظلت بيك
أعدل صورتك والكاها مكسورة
جنت أصورك بس أنته فوك الكاع
كلشي يصير أنته بكلشي الك صورة
يوم الماتمر صحـراء اصير عليك
وعليك من العطش كل ذره مفطورة
ظلي الجان ظلك هسه ظلي انبــاك
وأتذكر كبل ظلي انته ناطورة
شجره تكول بعدك ؟! ياهو المسميك
خضارك موشرط والناس معذورة
ماتسمه شجرة المايمرهه الطير !!
ومن سرب البلابل بقت مهجورة
مو شرط الا ّ اضوكك حتــى أمّيز البيــك
بلسان السوالف تلكة المرورة
وما تصعب عليه وكلشي أندل بيــــك
حليتك كب من جنت حزورة
آنه أدري بشجرتك هسه بيهـــه اغـــراب
وأكولن مشتبه لاهاية عصفورة
محبتي ويــاك كاتبهـــه بنقش محفور
ماكاتبها متلك فوك صبورة
وبين هسه حبك من اجته الريح
كبل طبشور اديك انمسح طبشورة
كبل كلش غشيم وكلبي آمن بيك
وحاجزها المشاعر الك منذورة
هسه أرتد بعد والعشـك كـفـره اعليـــه
وأصلبه اعلة الشجر لوفكر يزورة
امس كتلك يماي الورد راح يموت؟؟
حديقة حبنه يم الموت مخطوره
فقط للزينــة كتلي ومـــا أوزع ماي
وبشكلي الحدايق كلهة مسحورة
هسه اتندمت ؟! من نشف مايك جاي
من ظل عالتراب العشك ناعورة
لاتزكي الحدايق كــــون عندك ماي
ارجع ماأريدك ابقى نافورة
جاي اتريد ترجع من جديد وياي ؟!
كل عقلك تسولف لوحجي اسطورة
أيس حبنه مات شلون أرد المات
واباب الكلب صبيت كافورة