سيف الحلفي
احن واشتاكلك رغم المراره البيك
مثل شوك الزغار لنص شهر رمضان
وما صبلك دمع نشفت لهاة العين
بجيت الدم عليك ويبس الشريان
احن واشتاكلك حنيه السياب
لجيكور القديمه ومنزل الاقنان
ومن اشتم صورتك بانفاسي يطلع شيب
لذلك من ادخن ابيض الدخان
واحس فزاعه جرحي والدوه بجف طير
واليكتلك شماته مكابله البستان
مثل جويات ناكه بكلبي الك جويات
بقن نيشان منك ليلة النيشان
مماتي وزفتك حدثن بنفس اليوم
ومن بدلة زفافك مصلولي اجفان
ترى انه معزبه كصتي وجفي خمس ضيوف
ياهو الفهمك عالفركه ماندمان
بس الدنيا منجل والعمر محصول
واحس رغباتي بير.. ويوسف الحرمان
واسافر بس تصاويرك ألمها متاع
وأسد جوع العيون بصورتك يفلان
تهت بعدك وأدور شجره للاجيار
اكابر من طرت لا تشمت الغربان
طير اليحترك عشه وتشوفه يطير
يلطم عالصدر من يصفك الجنحان
دخيط سنين عمري بجيتك يهواي
وكحل ذكرياتي بمرود النسيان
وألون صوتي وردي بيوم الأحجي وياك
واشرب ارتباكي بكاس الاطمئنان
ياعرج السواحل موسهل ملكاك
ياطير الكطا الما يركد بعنوان
تذب سناره اذني تصيد حجي الناس
وتدور سيرتك لو صادتلها لسان
ياذلة هواي وفشله الرسام
من يعرض لوحته بمعرض العميان
وما باريك ذمه شلون افكلك دين
وشفت دم الشراع بخنجر السفان
كتلت العنكبوت وانه جوه الغار
وطيرت الحمامه بجية ابو سفيان
وحشاك من الغلط ياخلي بيه الصوج
ضيعني الخجل لو ادري ما خجلان
وتاكدت الحياء يغرك السباح
اذا ما ترفع ايدك عــالنهر غلطان
لأن ابيض كلب يتكسر الطبشور
فليحيا السواد وتسقط الالوان
وما اصدك تجيني تعوض الي راح
يانهر الي يدفع ديه للغركان
