كصر شوكك عليه
 وطال صبري عليك
وعلى امثالك بعد ما ترهم امثالي
جنت مالي كبل
 من جنت تنزف شوك
بس هسه انتهيت وصرت مو مالي
لاتنغر ابطولك ولو طولك بان
وعلى صدرك عنب عشرينك ايلالي
السعف هم عالي لكن ما يشيل احساس
وعلى احساس الجذر
 صار السعف عالي
شتلتك بيدي لهفه وخضريت افراك
ويم بيبان عينك دمعك ايلالي
المن جايني وياجرح جبته وياك
حافضهن عليمن جاي تقرالي
جرف شالك
ضميري وما شربتك ماي
وانه انزف عطش والصبر يبرالي
متغرني دمعتك ذاك كلبي انساه
ما يشتاكلك صار الكلب خالي
واشد عيني ابرمح
 لو مره حلت بيك
واعميهه اذا طيفك تعنالي
ندم خظرن جروحي ومكتلك شوف
ولا كدام عينك رخصت حالي
شتلني وادري ذني انه ما معذور
على خيال الشمس جنت اشتل آمالي
بعد ما يهز شوكك شعره من الروح
ولا يم بحر عينك تلتف احبالي
ولا تهم المناير طولك المجنون
ولا عنك بعد ينسمع موالي
عرفت ابرخص شعرك ولسواد البيه
وعرفت ابليل من ظل شمعك ايلالي
وعرفت ابدفو حظنك
 حرك غيري اهواي
وعرفت الذهب طولك جان مو غالي
وعرفت المن بعتني ويا جفن غراك
وعرفت بيا ندى غيرت شلالي
كبر جرحك بروحي بيا عذر ينداف
ترى بجسمي نزل ظل ياكل بخيالي
الشمس غرتني
 بيك وجنت اشوفك مالي
ويهدني الهوة والدرب يحلالي
ورخصت باب
 عمري وما كدرت انساك
شلته من الكلب بس زلزل ابالي
والك جتالي انته هسه جاي تريد
امسح دم ركبتي بسيف جتالي
والك جتالي انته هسه جاي تريد
امسح دم ركبتي بسيف جتالي