الشهيد علي رشم
بس اصبري
امرورة الفرگة اعلة صدري اتطيح نجمة
واعثر بصوتچ ضوة وأتبدة ضلمة
يوگف بصدري هوى يكفيلة دنيا وخلگي نسمة
توهة بردت
وانتي مريتي رصاصة
خايف تروحين واذبل والعطش يترس مكاني
وخايف اشرب روحتچ وآخذلي ليل وما اتاني
هاي الية سنين بارد
محد بملگاه چواني
شلون ما طگت عشب بية الثواني
ويخلص الليل ويخظر ليل ثاني
بية واهس كافر وربچ هداني
الليل شبعني سفر وانة ابمكاني
والتسافر عينة بترابچ حرام
شوفي منچ وين اغضة
يا مسافة البيهة جدمچ ما توضة
ويا طريق الما مشيتة وما عبر ظهري وتشضة
يا ندى المنطيچ عمرة شكبرة حظة
فكي شباچ الوجع وانطيني روح
يالمشيتي الغير ديرة
السما ازغيرة اعلة عيني وروحي اسيرة
الما يشبهونچ شگلهة هية حيرة
كل بعيد بعيني يصغر وانتي بعيوني چبيرة
چنهة حال الغيمة تلهث بالجزيرة
الوحشة ناس بغيبتچ ماعدهة غيرة
شلون اسدة يالفراغچ وين حدة
بيا عطش تلگين سدة
بكل جزر تلگين وجهي بلاية مدة
آنة خاطر لهفتي بكل طيف اشدة
وكل جرح يندارلي ويلگاني عدة
كل مكان العوز وبنادم غريب
وغربة العاشك طويلة بلاية ردة
حاصرتني الفشلة سكرانة اعلة وجهي تريد تلگالچ عذر
كون يعرفني الحطب چا صار ماي
ولا يورث بية كل حيلة الجمر
چا ولا باغصان خلگي اغيابچ يمرهة بكسر
چا ندهت الروح من نومة ضواهة وما نشف بيهة الصبر
چا اندليت الخسارة بيا كتر
چا عرفت شلون ما يطفة العمر
لو تجيبين الزعل كلة وتجين
چا لگيتيني نذر
بروحي لميت الندى وشبعتة ليل
وانتي ما مريتي بعيوني فجر
هذا عمري وذاك يومة وشوگي يلهث چنة جمرة
ياهو ما مشتاگ خل يطيني ليل
ومني خل ياخذ صبح بعيونة صحرة
وين ماروح التفت والگاچ يمي
بالوجوه الما تعرفچ عفتي ذكرة
بية يومية الجرح ياخذلة سفرة
ياهو مثلي وجهة فارغ من حدينة وتارس الدخان صدرة
وانتي انتي الغيم بعيون العطش محفوظ گدرة
وانتي ماكو شلونة حالي وهوة چان الملگة نار
ينزل شراعي حلم والماي يوگف
والنوارس ما تحط لو حظهة طار
الصخرة حظ العاثرين
وانتي حظچ توة صار
لو تجين
چا لگيتيني ملح بي حوبة امي چا لگيتيني خظار
شوية تاني امروة العاشگ نهار
باردة عيوني عليچ وگلبي حار
منين اجيب الحيل والحگ وانتي تمشين بجدم مطلوب ثار . حتى ميشوف الموادع كون من يوصل محطة
يغمض عيونة القطار………..
