احمد الصالحي

يـ الملّبس رصـــــاص او واهليتك موت
يـ الزفّيـــــت روحـــك زفّــــة العرسـان
وره ساتر صفنتــك خاتليـــــن اوحوش
وانته بساترك وحّــــــدك تعني انسان
رصاصاتك توّن ونيـــــن گصب الهــور
وتغنّي الداخــــــــل لوَن عدها السان
محزّم يـ النطّاقـــــك دهلة المشخـاب
مسرفن يـ البدلتــــك ضحكة البستان
من خفگة اچفوفــــــــــك فار چم تنور
من رشگة تفگتك فـــــاض چم طوفان
غيرة ماي عدّك خضّــــــــــــرت نهرين
دجله اويّه الفرات ابگصّتـــــك نيشــان
أنة شاعر خجل مـــــــا وصفيتك صــور
واعرف صوتك ايصمم چثيــــــــره إذان
يبن أم الّتي الطلگـــــــت بتالي الليل
صاحت يا ( علي ) وهزّت هواي اركان
يبن الرضّعتّــــــــك من ثـدي الشاجور
يبن الگمّطتّـــــــك من وحــي القـرآن
أدور الدنيّه كلها اتجيب واحــــــد كون
مثلك .. لچن مثلك ما تلــــــد نسوان
ريحة طيـن بيـك امسوّمه بـ ذي قـــار
عنــدك شاعرية كل أهـــــــل ميسان
شط العرب بيك وبصــــــــره والسيّاب
هلهولة احديثه وموش ياهــي الچـان
ياهوســه ومضايـــــــف مالتّها شيوخ
يـ مخـازر الدلّه ورگصــــــــــة الفنجان
يـ طويــر السمـــاوه وريفهــا وشاهـول
حچي الگنطره وضحكة جرف عطشان
هو أنته الجنـــــوب محـــــزّم بكل لون
الغيــرك مـا تلوگ اشما تحزمـــه الوان
فـوت بزود عاشــــگ ما يهمّـك خـوف
ما دام التحبّـــــــــــك جنّــــة الرحمـن
فوت اعله الدواعش فوتــــــة المبيوگ
بيتـه .. وبيـــده تفگـه وحـوّط الحرمـان
بس أنته الوحيـــــــــد بساترك ظلّيـت
وبظل الفنـــــــادق نامـــــــت الجرذان