كاظم علي الركابي

الكعبه بيت الله والوادم تطوف
وامي بعد البيت كون انطوفها
الجنه تحت أجدامها كال الرسول
يعني تمشي اعلة الجنان انشوفها
مستحب اتصلي مو فرض او وجوب
أمي بسم الله وتسبح أجفوفها
أمي حاتم بالكرم لو جانه ضيف
الشيله سفره او ماترد أضيوفها
أمي شط احساس للوادم تصير
أمي فاضت بالمحنه اجروفها
أمي خلت عينهه بطاست وداع
ومن جزيت الباب بدت شوفها
يمه محروس بعلي وسالم تعود
هاي ايه اشكد عشكت حروفها
أمي وكت العوز وايام الحصار
تغلي بالمامش غموس اعيونها
أمي درّت غيره من شح الحليب
وبالقناعه ايفيض ظل ماعونها
أمي رحمه أمن الله نزلت للعباد
وياهو يدخل جنة الله ابدونها
أمي لو لولت تنووم الما ينام
فدعه صارت بالنعي ايسمونها
أمي حرمة بيت وكت المستحاة
اوبالمزامط زلمه ويحشمونها
أمي لبست بيتهه ابغيبت ابووي
وامي سهرة بالنطاره اجفونها
أمي من تحزن وجهه اسود يصير
وينخبط دم البواجي ابلونها
يمه يم دافي الحضن وكت الجحيل
ابنار كلبج موكد اتدفينه
يمه يم نسمة هوه لوجانه آب
ابشيلتج حل الربيع ابعينه
البيهه موجلاب اشوفنه الصليب
اولو دعيتي الغايب اترجعينه
انتي باب الله انفتح بجفوف اديج
ومن تطيح اجفوفج اتسدينه