عبد الوهاب الحمداني

أريد احچايتك تنظفر مثل الليل
و اريد اولايتك تنعگد مثل الحيل
واريدك تصفر بگلبي مثل
ما يصفر البِلبِل
و اريد الرمش چيلة
ثار من اتمر على اولاياتهم تكتل
و اريد الگلب چف فلاح كلما
ينضنك يشتل
و اريد الضحكة بت ابيوت
من تسمع حزن تختل
و اريد الدمع زمزم حيف
لذنوب العشگ يغسل
و اريد العشگ وكت الريح
زود اشراع ما يمهل
و اريد أنساك بس وحي
 القصايد لون كلما تنذكر ينزل
او بعدني اعله الجرف
ويّاك يلما تعرف الصحبة
أو بعدهي الناس ما
تلگاك كلمن ملتهي ابدربه
وبعدك منتچي ابروحي
 مثل ما ينتچي اللبلاب
وبعدني اشرب نده اجروحي
 و الاگيك بنهر عالباب
يا زرياب ,
يا زرياب من
غنّيت للحلوات للهم
ما حسبت احساب ؟
ما غنّيت بيمن تكشخ الفقره ؟
وما اندليت وين اتخضّر الفطره ؟
ما دلاك دجلة امنين درب
 الشيب بلكت بالصبا انعبره
بلكت مستحه المكتوب
 يمسح كلمن او گدره
يخايب ماهي شروة عين
 خاطر يفلح اليندل
و لاهو مغازل حديثات
يكبر لو هواهن حل
يخلي الدنيا سبع الوان
مامش كل عرف بيها
او هواك يريد حِنّة عيد
تترس كل صوانيها
و آنه ابطرگ حزن امي او نعاويها
او حلم كل ساع يلبس
ثوب ما چنّه حلم حافي
ولا چن الشعر مرغوب
 كلها اتصيحلك كافي !
اليريد اينام بين الگاع
 و التنور لازم يعبد الخبزه
أو لازم يحضن الحلاج
حتى يرافگ المغزه
تره ابلايه ضوه الس
چين ما نندل وحي اسماعيل
ولا نفهم حچي النواب
 من يسولف اعله الريل
يا سجيل ،
هذا ابرهه ابعمري
شتنتظر يا جيل ؟
مليت المعاتب وي نده الغبشه
أو مليت الخناجر
من كثر ما موت كلمن يحلم بكبشه
يا دين الخناجر
من كثر ما موت كلمن
 ملتهي ابكبشه ..