ميثاق الهلالي

لاتزعل علينه گلوبنه تذوب
ماتدري الزعل شيسوي بينه
مثل ماتنذبح شمعه بسهم ريح
عصرنه الليل بعدك وانطفينه..
گلنّالك نحبك تزعل شبيك؟!
عسه لاگلنه عمي ولاحچينه
مدينتنه ظلام وعينك هلال
دفك شبّاچ عينك عالمدينه ..
يطيحن فوگ اديك سنينه دموع
غير وداعك شطايح بدينه
گمنه نخاف من عيونك عليك
گبلك چم نهر كاتلته عينه
ولاتضحك ضحكتك ترست البيت
عيون البيت تحسد مو أمينه
ولاتبچي أعله خدك لؤلؤ يطيح
احنه بطرگ خدك وانعمينه
واكسر باب گلبي بعينك وفوت
المايفتح الك تنشل يمينه
وأوگف لاتدگ باب الگلب نار
بس اشرلي بيدك وانه افتحه
كتب گبلك جروحي ودمعي والآخ
اعله مودك شگگتهن صفحه صفحه…
مو حسبالك أضحكلك بطر.. لا
ولا آنه الخلي وبجروحي شحه…
بس ضميتهن حته انت ترتاح
وحته احساس (احبك) مااجرحه
فرحني بعد لاتبخل وياي
گبلك ماشفت بالدنيه فرحه..
خناجر كلهه چانت گبلك الناس
واخرهم شهگ يم گلبي رمحه
واريدك خلگ سيف تجيبلي وياك
وخلگ الذكريات البيه اذبحه…
حته انسه النسوني وسدوا الباب
شكتبوا وشخذوا من بالي امسحه….
وارسمك يم صفنتي عيونك تصير
لوحه الماطرت من عدهه لوحه
وندوخ اثنينه ومانصحه للموت
نصحه المن! عمر مايسوى نصحه