لطيف العامري

والله لو تدري
عليك شلون حالي ؟
حال اليضيج الهوى
على شفاف ريته ..
وماأگول وداعتك
كلفه الفظ اسمك باليمين..
وداعتك لاموضعيف
من يضكني الوكت
واتوچه عليك
وداعتك لا موگصير
حتى اتطاول واصير بطول اسمك
وداعتك لا موضرير ..
حتى اگول تگودني
من أرد احط ايدي بديك
الشوف بيّه
يفرزن من بعيد ..ياتفاحة آدم
آنه ما ادور فضالة زاد غيري
وانت ريح شفاف غيري
الضاگتك..لسه تفوح
او وين ماوليت وجهك
تلكه شفه..
مباوسه شفافك (…)
غمّض وباوعلي وحدي
لا أتعبّ عيونك ادّور عليّه
آنه بيك ..
شوف روحك
تلكه روحي تصيح بيها
مشتهيـــــــــــــــــــك
بساعك اغرف مشتهاتي
بساع لوّن بيها روحك
لايفز بيّه (…..)
واحرك الدنيا عليك..
وسالفتنه ..
وداعتك
الخيل اعرفها عرف
الجامحه اندلها ..
واروضها على كيفي
واكره العاطف
لون وي غير حلها ..
مو وكتها ….
حچاية الخانت رجلها
وداعتك چاسولفتها ..
الليل من يمر على المثلي
يحچّي الصخر الاخرس
آنه شاعر
يأذنّ بروحي الفرزدق
(الله يعرف من انكرت والعجم)
واسحگ بطارف (….)
كل قصيده تصير للطاغي هديه
موبديه
والله من اكتب احطكّ
انت عنوان القصيده
يعثر المثلك
طريج اليستحون ..
دروبه وعره
يدنگ اليستحي يريد يشوف دربه
ويوصل المايستحون
الريح لو خاوت رمل
تمتد جهنم
واليلاگيها عدل بجماغ ابوه
يگول آنه..
واليلوذ بثوب اخته
تكشفه ريح الله
السفر ميزان ..
والسفره گصيره