محمد وجيه
ذكرتك بالوجوه الي ردت يمها انساك
وبدت بيك السوالف وانته تنهيها
وادير العين عنك والكلب يندار
وادير الكلب والكه شفافي تحجيها
البكلبي على لساني المصيبه بهاي
ما اجذب واكول العشره ناسيها
انه اتناساك واضحك جذب وانته بعيد
.وبس يخطفني ضلك عزتي اهجيها
تمر سوالفك ناي بحيايه الشوك
وتعرضلي الكرامه وما احاجيها
واغير مبدأي وباللهفه اغط الروح
وتفزعلي القيم بالكاع تجفيها
المبادئ والقيم ماتشمل اليشتاك
الهجر رب المذله القيم شعليها
يالمقيد عيوني بسهر وبدمعات
صار سنين ضلك مامراويها
مشيت وقصرت ماخذت عيني وياك
الاخذ عيني بغيابك بس بواجيها
انه صفيت روحي من المضه بلياك
وانته وياي نيتك مامصفيها
ضيعت العرف كطره ابحر نسيان
وانه لمسه جفوفك محتفظ بيها
شجره الذكريات استرها بلكي تعيش
ولو طبعك خريف وماتسويها
يل مكشف عشرتي كبال ياهو الجان
وانه حروف اسمك مامراويها
يبو سوالف شته ينكط برد ملكاك
اذا مو بيك روحي ابيش ادفيها
