جبار المياحي 
تنويه — كفارة الشكك قصيدة
وما قراهه
اطعام الف شاعر فقير!!؟؟
اتيمم ابأوراق بيضه
وكوم صلليلك قصيده
اجر كل بيت التكتبه
ايساوي عند الله صلاه
بس شرط تختار قبله
لو ردت توصل صلاتك
او وجه قلمك من توجهه
لازم القبله ضمير
وكبل ما تكتب قصيده
كون تتوضه بشعر
حته تطهر!!
خاف تلزملك منصه
وابتكر شي!!؟
واعبد الله
وكون كل مره جديد
حته كل بيت التكوله
تسمع الله ايصيح عيد
الله يكره
حته روتين العباده
والتسبح–
بالقوافي مستحب
يعني مو واجب تقفي
القافيه اتخنث القصيده
الشاعر ابكيفه يصلي
مو شرط يسمع أذان
ولو قره مقطع شعر
وكت الغروب
وجانت النيه دعاء
يستجاب الله الدعوته
حته لو يقره شطر
من دارمي
القلم من يحني راسه
يتخذ هيئة سجود
وكل سطر لو صله ركعه
يترس الورقه صلاه
حته من تقراهه تلكه
بين ركعه وركعه صوره
الله من يخلق الشاعر
ايجيب طين من النجوم
ويصفن ويكعد يخلقه
ومن يخلقه
ايسوي نص كلبه مشاعر
وباقي نص كلبه شعر
واليسن سنة شعر
يحصد اجرهه
واجر كلمن عمل بيه
الى حد يوم القيامه