رياض النعماني

هذا الصبح
و إحنا  مساهرين
إمرايه سوده الشمس
والعمر خلص خسارات و حنين
وإحنا لسا معاندين
إعلى الخسارة إمراهنين
ترحل   الدنيا  بمدنها…   بليلها
وجيوشها
و إحنا على الما بقى شي
باقيين
إمعاندين … إهنا إنعيش
إهنا إنموت
إمعاندين
الأرض هذي …. مو أرض
هذي سماوات
و درب
يوصل  الـ ( الله )
نمشي ويه الموت… رَوضناه و صار الموت أحلى
إنموت لعيون النحبهم
للتراب البي ربينا
للوفه
و للزاويه… اليومية
يومية تلمنا
إحنا من هالزاوية إنحارب خراب
أيامنا السوده و ندافع بالحلم، و الكاس
على آخر حجر
إحنا كلما طاح و احد … نكثر
ويكبر    كمر
إحنا من هالزاويه أنحارب دول و جيوش
قذرة
شلنا رايات الحلم… و الشوك
مجَدنا الأغاني
و بالزراك البل إدين
و بالغصون
وبالغبار البلوجوه
إنكول كلشي
ونفضح النواب
و السلطة المزوره
إنغني و الأغنية يا خويه عراقية و حنينه
و حيل سمره
نهبوا
و باكو شوارعنا و ليالينا الحزينة
إتضيك دنيانا….. و نوسعها بسهر
و بدفو
وحب
و الظلمة تضوي
إنت لو تدري العراق إشلون راح ايكوم
راح إشلون يدوي
إتموت دنيانا بيدينا… و إحنا فوگ الفوگ نضوي
على إعناد الباعوا الدنيا بكراسي, و على إعناد جيوش قذره
إمساهرين….
وكوسنا, وإحنا و خسارات العمر و نغني
لأيام الصداقة
وع الخسارة إمراهنين
على هذي الزاوية السمره,
الحنينه إمراهنين
اعلى العراق البيه تتنومس, و تتباهى السنين
اعلى المحبة,
و زهوة الشعر العراقي
وع العذاب
نرفع (( الأشعار )) رايه بوجه كل هذا الخراب
إتشيل كل هذي الجيوش
إتشيل كل هذي الأرض
وإحنا نظل إهنا
ويظل هالتراب