منتظر الشرع

عله عيوني ينز الليل اذا تغيبين
وأفز بلا حلم مرعوب أذا جيتي
أدور بأثر جدمج بلكي خطوة الگاج
وين الله وأشوفج بالصدگ ريتي
الله وياك سالم حارسك جبريل
وغير الهذن بذني هواي خليتي
تلميني وتطشريني عله گد الشوف
غير العشگ يمج ماخذت نيتي
تمنيتج واجيتج وآني أعطش شوگ
وبين شفايفج تطشر أمنيتي
بحلمي ومكتفي واتقنع بملگاج
بس بواقعج بالبعد هميتي
أشمج ريحة أمي وواهس العرسان
يالبيه الف معشوگ طشيتي
يالرحتي وبقيتي بخاطري المكسور
صفنه وعشگ بيه براسي ربيتي
تمنيت اعله طولج حظني افصله فصال
واتيه بزندج وملگاج تاليتي
يهمي وراحتي علميني حتى أنساج
قربچ والبعد أثر بعافيتي
يخنگني العشگ واتنفس امن اشتاگ
يمي وما أمد شوفي عله هاويتي
أحسده الشال گلبچ ماعرف يشتاگ
لو أنت بمكاني اشكال سويتي
أتناقض واعيش الضجه بس بسكوت
وارفعنج علم يعثر بساريتي
ماسهرانه اعذرج مالفاج الليل
وما متخوصر بالج طرف صيتي
لا هميتي بيه بواهس اليهواج
ولا انت ابتعدتي ولنت حبيتي