ميثم فالح

احلم تمرني حلم بس كون ما اصحة
والليل انحته صنم
واركعله كل العمر
بس لا يطل صبحة
من كتلي احبك قبل
فرحة بدليلي ازرعت
ميت الي شكم سنة وما ماتت الفرحة
من الامل صفحة بقت
وانكلبت الصفحة
و من صبري باقي صرح
بس الصرح من رمل
والروج اجاه كالنسر
وانقض على صرحه
و جفي اللواها الزمن
شجرة وجذعها انكسر
يا ثمر لتطرحه
و من كبل لا حشّمَك
مرخوص لو ما تجي
من عيونك اقرة الحجي
ما حاجة الي توضحه
يالساكن بنص قصر
حبك ربة وية الفقر
وتعتني الك شوغتي
واربط اببابك علك من هدمتي الملحة
كلبي اعله بابك رهم
ممنون الك فهمه
و للناس كله لسن ما تتعب تنصحه
و كله الوكت مو الك
و للشايلك بالصدر وك بطل تجرحه
و لو عاندك مارجع غنيله طور الحزن
يتلاشى مثل الحلم بس يسمع البحه
غمضت عيني جذب ردتك تمرها حلم وتكيف بشوفتك
ولو جاي ويه الحلم حلمك يرد وحده جا عيني ماهدتك
وابجيلك بلا وعي غيمه ودمعها مطر
لو شفت وركه اذبلت من ورك لبشجرتك
وصّاني بيك الكلب او روحك علي وصِّتك
بدرب الوصيه سرت
وانت بدربها ابد متحركت خطوتك
تكطـِّـع اثمار الشجر قوة جذب بالارض
وانت تكطع الكلب قوة جذب نضرتك
روح العندي جنح او حبك سكنها كسر
و مجنونة ما ملتك
اعصر عيوني عصر
ماي اللي منها يصب بي تنرسم صورتك
همـَّك يوكـِّـع جِبل
امك شلون اكدرت تسعة شهر حملتك
كوخ بجزيرة العمر
وتسأله من احترك هم ناس اجت طفتك
سيفك كطع يمنتي
او من طحت ليك اِفزَعت وبلا زند شالتك
تمنت ترد للزند
جان بمحنة اورضى فوك الصدر ضمتك
واشتعل كلي واشب او من تكبل انت علي
برد او سلام انكلب من اوكف بحضرتك
او مرخوص من اشتعل مد ايدك انت علي
نار اللي بروحي قسم اجويها لو جوتك
او كالوا البوسة ذنب صدّك وحق النبي
الطفل من قبـَّـلـِـت جن قبـَّـلِت وجنتك
او لأجلك الغيرة اكبرت من ايد الجلالة غرت
من اصفن وفكرت وكت الخلق لزمتك
او حاذر بعد لاتمر
اعيوني خلصن نظر
او من تمر مرة بعد ينطنك اللي بقى
او حوبتهن بركبتك
وعمري الكضيته ركض الدرب ويه التعب
من الخطوة الاولى لاخر خطاوي الجدم مأمنهن بذمتك
وماكول فدوه الك لو ضيــَّـعتهن علـَي
نص لا يرحن لنضرتك
او نص فدوه ضمها الي خاف التقيك بدرب
شكد اجمع عُمُر
نص فدوة اخسرها الك واربح فقط شوفتك