أنيس العيساوي

دورة سنة والدي
وميلادها الليلة
واحتفل مدري اختنك
كلبي نشف حيلة
محبوبتي و والدي
والسالفة ثكيلة
وما ادري هسة احتفل
لو اكعد ابجيلة
يا والدي ارد احتفل
بس جرحك شكبرة
مشتاكلك يا نفس
ظل يلجم الذكرى
محتاجك بكد علي
لو صاحتة الفقرة
ما قصرت يا فحل
رباني عالعشرة
محبوبتي تسودنت
تيهت دليني
بين الفرح والدمع
ما لحكت عيني
شايلج اني فرح
ما شالتة اسنيني
بس جرح ابوية رطب
يا روحي عذريني
يا روحي ادري الدمع
يم عينج وما وكف
وادري خذاج الحزن
من عيدج وللنجف
بس وغلاتج جبت
عيد اكبر من الصدف
وشموع ما تنحسب
كد دمعج الما نشف
يا بوية ردتك تجي
وتخطبها الي ونحتفل
وشيباتك وكل جرح
تنساها وترد طفل
للناس تفرح جنت
فرحة الغربة بشمل
زين اني وابنك بعد
شتسوي لو بس عدل؟؟
محبوبتي و والدي
مدري شكبر حيرتي
ومابين بيت ونجف
تاهت صدك نيتي
شمعة اعلة كبر الابو
وشمعة بحضن دنيتي
رايد اعلكهن سوة
وما تنخبص دمعتي