علي ناجي

يالشايل عليه هواي مدري
 شلون أودعنك؟
صاحبتك بعين الماي جف ناكَوط
وأحتاجيتك اتبدي العمر سكته
مدري شلون هزني الحيل وآني الردتك أتثبته
كون أنساك جانت تعكَد لسانك !
كون انساك هسه مفاركَه مجانك
ارتاحيت؟
الله وياك ..هِدني وشيل ذرعانك ولا هينات
يل تحلم بروحي تبات,, وين اتبات هسه انته؟
يل سديت وجه الملكَه الإبعيني
باجر جان موعدنه ووعدتك شوف
إذا ماجيتني وداعة دمعتي أنساك
الترس جيبه دغش يعتاز
 جلمة طيب من يعثر
التوضه بعيبه يبرد ليش؟
لازم بالستر محتر !
يا هو الكَالك اجرحني حته اتطيب؟!
دموعي الطاحت بفركَاك
محسوبات عند الله
ردلي اليوم باجر من تطيح بضيج
ياهو يكَلك اسم الله
نخيت الكَاع التعثرك إذا ماجيت
نخيت الماي مايرويك من تعطش وتنساني
تمنيت الهوه بريتك يكشف
 الضيج ويغطي النفس بيهه..
آنه مخنوگ من فرگاك..
ما محروس إذا ماجيت
آني الفكره ناسيهه, لون رديت
بس احجاية التنگال هم تنراد بعتابك
اجه ابالي,,, اجي لبابك ،،وادگه عيون ،،حد ما اوكَع بشوفك
وأحط ايدي عله اجفوفك
وكشف العيب البراسك
لچن بحلامي شايل شوگ .. لذلك ما رضه احساسك