صباح العتابي
ها يبني اشگلت للساتر ورديت
اشگلت لارض الحرام ومتى ترد ليهه
وتفگتكً ماخفت تستاحش أمن أتغيب
متعوده اعلى چفك يرد سرگيهه
اذا گالو صعد للواجب ارتاحيت
واذا گالو نزل شو فشله احس بيهه
أعرفك راعي زود وصيدك الصعبات
وتهوى العاليه وماترضه تخطيهه
السواتر مهره بردانه لنفس خيال
بدفو الغيره البراسك گوم دفيهه
يصياد المكارم غاليه الچيلات
گبل لاترمي يبني الچيله وصيهه
اذا ماتطب راس إعداك عيب اتثور
التفگه ألما تجيس اتخون راعيهه
زغير وجان جفك مايلوح ازناد
وتمد التفگه حتى اتسيطر اعليهه
وهسه التفگ وأهل التفگ يتمنون
چفوفك چي درو محد يلاويهه
الطلابه اطلابتك وانت التعدل الراي
وموش انت اليطب الهه بتواليهه
دلكد مهرتك خل تشگ صدر الريح
واعمي اعيونهم بتراب رجليهه
يبني السيف اذا رافگ اكرابه ايموت
السيوف اتعيش بركاب اليعاديهه
ولتلوم الاصيله العيب بالخيال
تره زود الكحيله بزود واليهه
باگو ستر گاعك وانت ابن فلاح
وابوك ابدم وريده الگاع شاريهه
يبني الموت هين عدنه ثار أعراض
چم حره التجاسر خصمك اعليهه
أريدك تمسح اخدود السطرهه الضيم
وترد كل دار سلبوهه امن اهاليهه
أريدك غصبا اعلى العطش توگف ماي
لا زينب ترد والعطش ياذيهه
ضميرك خله شمعه واذا خصمك ريح
تخنگه الضلمه اذا فكر يطفيهه
شد قبضة تفگتك على اچفوف الغيم
وفوگ إعداك تمطر فشگ خليهه
واذا تدفن جثثهم اخذ رأي الكاع
ماتقبل الغربه تندفن بيهه
