سلوان المحمداوي

تعال وخل اكلك بالضياع شلون
من تحب شخص والموت يتعناه
من يوادعك و وداعه ملكه يصير
من توكف ابابه ورسمه ما تلكاه
من تشوف اخو اليشبهه يحجي وياك
وتتبده اعله وجهه وتلتم بمكفاه
من تحفظ ابياته وهو شاعر شاب
من يحجي البكلبه وراد يتمناه
من تبجي اعله سر بس هو يعرف بي
ومحد قدره وشخصه افتهم معناه
من تخاطبه وميرد ﻻن مدفون
من تشتاكله وللكبر تتعناه
من تكعد كباله وتبجي بس ميفيد
وروحك تختنك لمن يمر طرواه
الضياع العايشه ينشاف مو ينكال
يدك بابي الفرح وبدمعتي اتلكاه
حته امن اخطبت ظلت عيوني اتصيح
شكو ميت ابربعي اليوم اريده اهنا
شكو ضحكة صديق اندفن بيه تعيش
انه عايش جفاهم بين لجمه و آه
انه رايد نفس يختلف مدري منين
المهم رايد اشوف الكلنه ماشفناه
ضياعي بداخلي وبين بوجهي الشوك
وملامح وجهي بانت بالحجي الكلناه