مشير السعدي

باچر شو جزانه اوصار امس واسبوع
وانا مناطر الجيتك وين ماوين
حسبالي انكليزي ابموعدك وياي
شاتلني اوتروح اتزور الحسين
انت اوي الحسين ابشنهي تتلاگون
حسين امرافج الله وسبط من سبطين
وانت ابليس اخوك اوربك الدولار
يعني الدين عندك لوغله ابلفسين
حضن حسين آيه اورتلتها اللاء
خدر زينب ثمنها اوخنصر اوچفين
حسين احچايه وحده اوموقف اوتاريخ
حسين ابلا نبوه اوثبت الكم دين
حسين ابلا عريضه انطوف بيه ونزور
وانت من اليضيفك تبتعد مترين
عفطت عنز كلك لا فقاعه ابريح
ابحبر اصبع مواطن تنشمر للصين
حدر اجناحي تلبد من نعيگ اغراب
اوعنك چنت اجاوب الف جيم اوسين
خلف الله اعلى بوش اودچ عليك الريش
صگر سواك فوگي اوشد الك جنحين
عليه اتبيع مالاتي ابفلس فافون
يالسعرك مكور نص فلس من طين
صَرينه السوالف حدر راگ الهور
اوحلفنا ابچرغد امك مانصير اثنين
صرنه ثنين هسه اوامك ام مسؤول
وامي ابطشت تفتر تطلبنه اطحين
ماغزر لبنها اوگيمر اهل الهور
تجسملك غداها اوتعس بيك سنين
واذا ماصخ ملحها البي تطعم الزاد
هلبت بيك غزر ملح ماي العين
المذهب والسراط البيه صدعت الروس
مو للوكح مثلك للفقير ايلين
من اوه امداك شگد رخيص اخلاق
تتشلبه الكراسي ابسد فحل صفين
يمطيره اليشنهج ينهطر ويطيح
يعثر عثره گشره اوينسدح بالطين