جواد الحمراني

كون يموت كلمن رايد يموت
وكون ايظل عدل بس النريدة
وكون ايرد غني ومحمد اردود
ورحيم وبارق وروحه الشهيدة
وكون انرد جهال التاتي توات
ويجينة الطنطل وصوت الرعيدة
أو..نداوم صبحي وي درس العصافير
ونقرة ابشامتچ يا ست وحيدة
ونركض من نحِّل حفاي للبيت
ونشاور بعض ها….شفتوا غيدة
شفتو أش..أشرت لبن ابو الدكان؟؟
حمامة سيد ورادت تصيده
ونسألها يعيِّدة الشوط ياشوط
أوشنحمله الهوى عيدة ونزيدة
أيييييياه اشرجع السبعين للبال
بخت ينراد للذكرى السعيدة
ياريحة مطر بخدود التراب
چن ريحة كتب ريحة جريدة
كون الموت يرضة انواجه الموت
مثل البالسجن يوصل بريده
اشكثر اشتاق للچم مندفن غاد
لكن شوفة الميت بعيدة
أنه مفارگ بشر ماتشبه الناس
انهجم بيتچ يروحي شگد عنيدة
صلافة البيچ ياروحي مثل ذاك
الـ..على صبعه ويسِّد الباب بيده
عليهم مابچت بس الحمامات
ولا  بس المجانين الشريدة
عليهم لا اله الَّا الشعر چان
بعـد الله ولا عبدوا عبيده
وجه الكمر أصفر گاطع الزاد
وبچت عين الشمس گالت اريده
انهــدم ركن الغزل ياشاطي فيروز
الصبح منهو الگدر يوصفلي جيده
عود شگد نتاني ومثلك ايصير
يمحمد بلوجوه الجديدة
ومثلك يامحمد ياهو بالناس
مشه وبس الفراشات برصيده
ومثلك يامحمد ياهو بالناس
كتب (زينب) على چفة عقيدة
دفنوا ويَّه جثتك سبع نجمات
لأن صوت الشعر دفنو عميدة
رسمنة اعله السواتر ذكرى ميتين
وشتمنة الشوش والنهضة المُبيدة
وكتبنة اعله الجماجم اغنية خوف
يغني الفاو والتعزف حديدة
مثل العيد شالع گلبه رمضان
داست عمرك الحرب “المجيدة”
كفرنة بكل حروب الخاكي والناس
تكتب عل هروبات العديدة
وانتة اتخندقت شعراً ولا يوم
طخَّت هامة الوعي المديدة
محمد چان دمعة بخد عفيفات
ويموع الماي لو خلاهه ايدة
لگة الخلوه الطويلة بقصر التراب
وگعد يكتب عله الموته الوحيدة
وچن اذني تسمعه يقره بالليل
للماتوا  قوافيه الفــريدة
ترس وجه الچفن شعر الحبيبات
وكتب نايل ترف فوگ الجِريدة
منو گلك (غنــي) ما گاله الله
ولو (كاظم خبط) ما صاح عيده
اذني اتأكدت لو شاكة ايصير
بس شاعر فحل..لا هاي أكيدة
حلاة الگال شاعر لو كتب كُون
يشلع صرة الگاع بقصيدة