حسين المالكي

بعد ويه الهوه ماتمشي الأنفاس
ولا أي نفس ارضه بريتي يدخل
اليرسم شجره كون ينكط افياي
وعلى كل جفن يابس طيف ينزل
الصاير جفنه اسود ساحكه الليل
طيب وسهر ويه دموعه يهمل
المناطر حبيبه يخضر اوعود
وعلى كل درب فركه ملاكه يشتل
تعال البس عذر فشلت الجروح
اليعض شفافه لازم جلمه يكتل
الماي هم هوه الله يشم الورود
يانهر المشه وتارك جرف ظل
البروحه ضوه لايمشي بالليل
جم موعد يشوفه وراح يجفل
انه محتاج خيل تخورس الكاع
اعله حس نظراتي كون تكوم تصهل
أمن اعله الهوه توكفلي حسرات
من اذكر عشرتك جم ذكره تهدل
شربتك عطش وادري بروحتك ماي
وعرضلي اجم نهر بس ماضكت ذل
مشيتك ويه غيري تحدب دموع
وتدير عيونك وماجني الك خل
حكك ماتفز طعناتك هواي
المايفهم الورده بيا نده ايحل
كشخت كبالي لابس صفنتي تفوت
تره الخامه جرح بأي دمعه يهزل
البي ريحة مناجل يحجي فلاح
ويدور سالفه يكض بيه سنبل
الشايل دفو ملاكه تحسه جبريل
وعلى كل غار ذابل ايه ينزل
المامر اعله جفني وكحل الطيف
بيا نجمة وداع يروح يختل
الكعد بالبال يفتر سالفة ليل
ردت كطرة ثواني اباله أشغل
كسرة خاطري تعثر دفو اجفاك
جبت عمرك شته وبروحي تشعل
الخله بصفه يكضي الليل مرتاح
وتكفض دمعته وظل صفنته يقل
بس الفكد خله شيحجي بالليل
وحكك بالسلام يكوم يرتل
اليكفر بالكصب لايشبك الناي
المو راعي صدك منه الهوه يمل