ايمان الكوفي
در حنانك فرفح ابروحي رضيع
استغرب وصدر الوكت غرز شمر
ماعله المضطر ذنب ذوبني بيك
ربي صورني ابكلب يهوه السمر
ارباي منكور ابفطم واهس خيال
ادري تنسه التعب ويضيع الاجر
ومهدك ايفرع ابسطح المشتكين
يدعي نار الشوك وتظل تستعر
صرت مجنونك ابمرسوم وبيان
اشفافي مطبوعات بآثار الجمر
مدري غفلة عقل لو غفوة غرام
دخت ماميز النار امن التمر
اذخر اوهام الهوه ابنظرت سراب
حتى لبليس العشك ناذر نذر
استرق الشم صرت مدمن هواك.
اتنفس اطيوفك واكاسر بالصبر
الموت ميغير عنواوين الزهور
ولاتزكي الباك بصمات الحبر
اتمايل العاكول ما كالو رقيق
بس دمع جفن الورد فاح العطر
ملل لو ماضحكة عيون الاوان
وتبقه حور العين بثياب الخضر
لون طيف العاشك ايخطبه الخطيب
ما نصبنا الكمر شاهد لو مهر
اتصبح الفردوس بير بلايه شوف
ابزي موحد ترتدي كلها اليزر
تنطفي شموع الاثاره بلاعذاب
يموت طيف الشوك بس ما يستقر
