جواد الحمراني

كلت تكتب عليه كتلك اختار
اكتب لو اجيبن صوغة للدار
كتلي بروح ابوك اكتب اذا اموت
اشفعلك كلت تدلل وصار
كتلك زين اموتن كبلك شلون
كلت وازيتني هسه الكبر طار
ضحكنة وكتلك استشهد وانه اثيرك
وابجي الغيم فوك اخدود الاشجار
بس كونك تكلي  وين الكاك
يم يزينب ( يمهدي) يم الانصار 
دربك مو حجي مو ياهو الجان
 يتلكاه علي وبي يعبر النار 
حاجيني يمهدي هم الك روح
من دم ولح لو انت منشار
ولاجنك دفنت عيونك هنا
صلف ما توجعك بزة البسمار
اذا مهدي وابو صديقة والطير ( علي رشم )
وابو كوثر واخوتك جوة الحجار
المثلك دفنهم لازم يموت
كبل لا يكعد بجادرة الخطار
يهل دافن ابئيدك حتف الابطال
دفنت اليوم الاشتر وية عمار
جذب لتكول هذا تعوضه الناس
جذب لاتكول مايحتاج تحتار
لون تحبل الدنيا بنطفة السيف
واسد يبرالها وتتنسى بالنار
وحقك ما تجيب ولا تلد حيد
يجي نص لو ربع وي مهدي تكدار
واخو زينب لون اندور الكون
مثل مهدي جذب ماصاير وصار
شيعوض الركص بالشام سنتين
والنصرة اعله اسمه تصير طشار
على راس الزلم بس مو مثل هذا
لقط وين اللقيط وضار ابن ضار
على راس الزلم بس مو مثل هذا
ايدة وي المغيسل حار بحار
على جبهة النصر يصيح الجيش
اجاكم مهدي ارجعو طب الاعصار
زلمهم من يطب ماتندل منين
اجو وشلون كلهم دخلو انذار
الزلم ترفع شعار بنصه مكتوب
من مهدي اليفر ما ينحسب عار
اله براس الزلم سبعين شاجور
واله بضلع المراجل ختم مكوار
اذا شمت تفكته اتبعه النسور
يسملهن سنه وما ماخذ الثار
حوم شما يشد بيها الزرازير
تموع اعظامهم ويخدر المنكار
ويظل يلكط براهي السيف الاسمال
دوه اركاب النواصب جفه عطار
يهد ومن يهد ينكع البارود
وركاب التفك من خوفه تندار
مايرجع لون يطاحن الجيش
مايرجع لون الجيله تحتار
يا من هامتك شيعي وللجدام
شكثر الله بفطرتك ودع اسرار
مثل عباس من تحمل على الجيش
مثل عباس جفك عالنهر طار
ومثل عباس نحرك شمه الحسين
ومثل عباس عينك للسهم دار
كون انصب ذهب شاجورك وكون
الريح الريحة اسمك خدم تندار
وبدمك انظف اهل تكريت
وحط بسطال رجلك بيها مختار
ووزع غيرتك بالحصه عالناس
بلكي تصير اوادم اهل الانبار
مع كل احترامي تكول كاروك
يهزه شعيط والحايوف والجار
طحنت بالبسوس العرب اجيال
على ناقه وعجوز ومال خطار
وهسه سبايكر نحرتلي الفين
ذبحاً ما طلع بالدولة فجار
انه بدولة حكومة شبه الارجال
انه بدولة حكومة النصها تجار
انه بدولة حكومة بليلها تبوك
وتصبح عليه هوسات وحبار
انه بدولة تخاف تجيب الاسلاح
وتريد الحشد يحميها بحجار
انه بدولة اليفخخ عدها مشلوت
نواب الضحايا تجيبله اعذار
انه بدولة شراكه وي بني العاص
وتكلي علي وقانونه معيار
انه بدولة الشيعه بثار الحسين
لمن طالبت كتلت المختار
انه بدولة مهازل عرض بالطول
ياصفحة الاخيط تنكلب عار
شايفلك حكومة تبيع مسجون
شايفلك حكومة تبيع الاثار
شايفلك حكومة دمج بالكون
تنسه الجاهدو وتعين الفرار
ماشايف حكومة اطوف عالبيت
وتحج كل سنه وتعبد الدينار
الك الله يشعبي الشيعي مسكين
اكل خبزة الموت الوحدك فار
يهل موت الخذت ربعي  من العيون
لك جريت اذني وخوش تختار