زمـــــن الحركـــانــــي

حقك تزعل انته الذنب موبيك
الگبلك گتله هم ماياخذ الراي
وموشرط افتهمني الراسه متروس
هوه متروس راسه ويعزف الناي
گطعت اچفوفي خاف اتسلم اعليك
وبعد ميهمني جاي بدربي ماجاي
وإذا ناوي انته ترحل عالاقل گول
اقل شي حتى أجيب اچفوفي وياي
شنو فضلك علي من غير الجروح
تريد بذيچ أذكرك رايد بهاي
من انكسر غصني وعندك اجناح
الغربان اجت يمي وانته ماجاي
أعديهن چنت چانن قليلات
بس هسه السوالف صارن اهواي
أذكرك مدري انصحك حاير وياك
تريد احچيلك العندي بصراحه
إذا تمل صوت واحد لا تكتبه
لان بالورقه هم تسمع اصياحه
بصف مخنوك لا تتنفس بصوت
لان صوت النفس يسلب الراحه
قطار الذاكره يطلّع بالإعزاز
ويجيب اجروح ماعده استراحه
الخاطركلبي اعوفك حتى يرتاح
اليودع الرمح يرتاحن اصفاحه
اليعطش دنيه عاف الخاطر الماي
هيج انه من اعوفك عدي راحه