سمير صبيح
عمت عيني عليج وليش يابغداد
مو جنتي على ليلج هذا محسودة
ماشوفج مدينة وضاوية وتزهين
اشوفنج نذر للموت مكيوده
ودجلة بيا وجهه للخضر تهدي اشموع
اذا صارت جرح عل كاع ممدودة
وسكتتنه صليب وصرتي عيسى عليه
اغسلي ايدج بعد تبقين مشدودة
لان ريح الحقد نشف اهواي اكلوب
وثكَل كلش حقدها وحيل مهدوده
بس باب الحوائج باقي والنعمان
وبقيت البوب كلها بخوف مزدودة
امام بكل جرف مثل العلم مرفوع
وشاهدنا الجسر عل الخوة موجودة
وشدينة الجرح ونكَطع حبل الخوف
ونشفنة الدمع ونسدت العبرة
بعد ما ننطي لزمة انظم ملح بالماي
ميزنة الحروف وضحت الجفرة
ما نغلط بعد ونصير مثل الخيط
اتحطنة عله الفتكـَ وتعوفنة الابرة
عود احنه ويبس منصير ماشة نار
موبينه الحفر والغيرنه المجرة
تجوينه نعم نكَطع هواهه اتموت
كافي اظل عمر بجفوفنه الجمرة
وحلمنه الليل يصلب والخمر والطير
والف يوسف اجانه ومحد يفسره
مانعرف مشينه وياهم امغمضين
دفعونه وكَعنه وغطو الحفرة
والجفه طول مدهه وطلع ورتاح
وبو النفس العزيزة لهسه بالنكَرة
ردت صوتي امس توعدني بالتفاح
وصلت المنصبك تحجيلي عل الخضرة
نفس الفائدة الموجودة بالتفاح
بس هاي بحَـمَار وهاي لا خضرة
كافي أضم عـَلي أعرف شنو اليصير
سيل الدم اعرفة وياهو ليفجرة
وانا الميت اعرفة واعرف الدفان
اشوكت ماريد اروح واوصل الكَبرة
وكافي من العتب ونلومها من اطيح
على الفاسة اشبديها ونحجي على الشجرة
ولا ذنب النهر لو عكس مجرى الماي
الكَاع اتصير رخوة ويعكس المجره
وخد الينسطر شتفيده تبجي العين
اشما صَبت دمع ماتنفع السـَطرة
وبيه اشكَد عتب وشكد ملامة وحيف على الدمع البجيته وماطفت حسرة
على الردلي تبختر لا فرس لا سيف
ويحجي بكل رهاوة وطعنته بظهره
على اليوكع فريسة اشلون يغفه الليل
ينام بيا وجه وذياب التنطره
مثل شذره الكرامة ومحبس الانسان
وبيها اشكَد محابس ذبت الشذرة
