ادهم عادل

سأستمر!!!

گبل لا چتّف واسبل!!

اريد اسأل..

ليش اليخنگ احلامي..

ويبوگ عيوني..

ما يخجل اذا صلّه!!!

واشوف بنيه هلكد

ما تحب وتخاف!

من طاري الشمس تچفل!!

گبل ليصير عوره الصوت!!

اريد ام الشهيد بكيفها تهلهل..

گبل لا اجلد الزاني

اگله اعشگ!!

وافهمه الله اليحب 

الناس ما يختل..

گبل لا عمّم اطفالي..

اعمّم گلبي المفرّع!!

گبل لا احجّب بنيتي

افهمها الشعر موعيب..

لكن عيب لو ينضفر

بيد انسان ميحبه!!

گبل لا اصوم 

اشبع من طواري امي!

مو صايم وانام!!

(وهيه جوه الشمس علاگة مخضّر

من عزل بات من امس)

گبل لا اقتل المرتد..

افكر ليش عاف الله!!

اشبّعنه خبز وهدوم..

واحترمه!!

گبل لا ينگطع چفه!!

حلال البوگ للجايع!

اذا راد المريض ينام

عيب يأذن الجامع!

(عيب الطفل يجفل

من اسم الله!!!)

گبل لا اصلي واتوضه

اعبّر شايب الشارع!!

كون الدين ينطي لكل 

ضرير عيون..

ميسوي بشر ضايع!!

(اريد ابني وطن للناس..

گبل لا ابني بيت الله!!)

ما التزم بالاحكام.

اذا خلتني ضد الناس!!

ما احترم نص اي دين

شرّع موت بنيادم!!

اهمل كل حديث

يگول اجبر عالم تحبك!!

والكافر اشوفه انسان!!

ميهمني يشوف الدين من يا باب..

ميهمني يصلي شلون !!

ولا اسأله رسولك وين!!

بيني وبين كل انسان

دم وطين!!

بيني وبين كل شجره

علاقة تين!!

احب الناس كل الناس

واحضن كل جرح

ما يدري اصله منين!!

اسيّر سالفة نسوان..

وامدد گحله جوه العين!!

ما احتقر اي انسان!!

وما اكره شخص..

ما دام الله مفتّح البيبان!!

ما دام الشمس تتغطه بالبستان!!

وحتى الشجر عشره وياه..

اذا يبرد،،

افصّله الورگ قمصان!!