عطا السعيدي 

يصوباط العنب ياكوسر فياي..

لواني العطش يسمر لويت العود..

انه مبورح وخدك رشفت الماي..

يانبع الزلال العيب مورود..

عسل طعمك بلاكت حنضل وياي..

انه بهيمه وحماد وكيظ صيهود..

انسمت برخص اثماني وردت شراي..

وطشرني الزمان وصاح فرهود..

اشوكت جفك يناهي ايلم بكاياي..

وينشف مكاطر الدمعه من لخدود..

اذا مابيك همه وتنتخي بهاي..

عيل شلي بعشرتك بيش مريود..

عليه ترادفن طكات دنياي..

وتحزملي الوكت بحزام صايود..

الناس براي ونه طحن بلف راي..

ورد ليام شوكك ياحلو ردود..

ارد وياك كحله ومرود وعين..

يبو رموش التغازل جرة الميل..

انه الطرواك اصوم صحاح حولين..

ولوذن حدر كترك لوذت دخيل..

ارتل يوم اشوفك بره وياسين..

ابرهبه وبيك ابتل الكول ترتيل..

يهز روحي الحنين وتطك جرفين..

ويرف جفني ودمعتي بلا وعي تسيل..

رجيت مواصلك رجوه المحبين..

اشكثر وشجم تنيت وناطرت ليل..

الك لجمات بضلوعي ونياشين..

تعيل وشوف عيني وكلت ميعيل..

لن طبعي منعاشر عدل حدين..

ولاني من يراوي ويضم بشليل..

اثاري الناس عمله وطبع وجهين..

تراوغ وين مامال الهوه تميل..

جبح خليتني بمفرك طريجن..

عساهه بذمتك ياباطل الحيل.