كرار فياض
صوتك محطات الحلم
والسكته روح المستحه
وعينك سوالفهه جرف
بحساسهه النورس غفه
والجلمه من توصل همس
يسنح هوانه وتنكط شفافك ترافه
وتنسحن روحي بنفس
ياخلك جلمه احبك
تكولهه بليل وسكون
تكولهه وبينه السهر توه بده
ياطعم ورده على خدك
بيهه لوحه من الربيع
تناغم حساس النده
تدري بيه الشوك ماي
مسافر الحسنك ربيع
شما سمع منك تــــــعال
اتبده شلال على حضنك
هذه انه هذه انه
بهمسه منك
تعرك الجلمه على شفتي
تفرفح السكته طواري من الغزل
وتنبت ابستاني شجره من الخيال
واسكي بيه الروح لهفه
يخضر بدمي الحنين
وتدري لو صدفه وسكت بيه الغزل
يستهل عش الحمام
يفزز الدنيه عصافير على زلفك
ويتلاعب بصدري النفس
وانت… يا مستحه عيونك
يلم بقايا اثار خطواتي الك
تبتعد من حضني تضحك
وتبدي تستاحش ضحكتي
وريح بالرجفه على صدري
تغطي ظلمه ويه الخلك
ونحاول نزعل الخجل
شمعه نعلكهه بـــعـــــــيد
واششششششش
لا تفز ريتا الحلم بيده بريد
يخاطب الشوك , الصبر ,
يبني دنية حب بعيوني تبات
يعبر الدمعه على خاطر
(ابقى الك ), لو (منتظر )
وثنينهن واهس حياة
