سيف الحلفي
علي باحلامه شاف عمامه فوك الماي
وفز من الحلم بخدوده كطرة دم
كل ليله بمنامه يراوده الكابوس
حرك خيام جان بكل حلم يشتم
كلب والد..يحس ابنته من تنضام
وترافة طير زينب وين تحمل هم؟
اليتيمه المات ابوها…وزينب استثناء
زينب لو مشه العباس تتيتم
المهد كبل الولد ما حضر الكرار
حضر مشرعه ونار بخيم تلهم
وكبل خرخاشه ماكو بمولد العباس
نطا جربه صغيره عله السكي تعلم
علي جان بمنامه يشوف ركضة خيل
وصوتن مخفي يهمس بأذنه.. هل تعلم؟
بنو هاشم قبيله ..اتسمت عله حسين
لأن بأرض الطفوف ضلوعه تتهشم
ومن يسافر علي ميودع العباس
ما يحمل يشوف جفوفه لو سلم
ويرفض لو طلع ينذب وراه الماي
ويكل لأم الخدر ضميه يبنت العم
تكله الماي اضمه؟؟يكلها لا عباس
سهله الماي المه…جفوفه ما تنلم
وبيته…بكد عمر بنت الرسول…صغير
قديمه بيوتهم..بس ثوبه جان اقدم
بدونك ياعلي الاسلام فاهي يصير
يملوحة الدين الغزرت بالفم
عله متونه رتب من يمشي قائد جيش
جيش الفقره وبرتبة فقير اقدم
علي زارع ورد كدما مكطع روس
تكطر خجل كصته وسيفه يكطر دم
وعجيبه جفوفه خشنه بقبضة الفقار
وعله خدود اليتامى من الورد انعم
يظل يبجي قبيل المعركه بلحظات
ومن تشتد..يظل فقاره يتبسم
يبجي من القهر من يحسب الكفار
يدري اطفال واجد راح تتيتم
ذو الفقار شايل مدري عزرايين
ويرد للزهره شايل زهره يتبسم
علي كبل الخليقه طاب محضر خير
توم ويه العرش..وتشابهو بالدم
أخذ من الله عطوه بشغلة التفاح
ولو ما بخته ربك ما غفر ل ادم
بمولد عيسى مريم جوه شجره تنوح
وندبت ياعلي من عسرت مريم
يعشكونك يحيدر وانه اكلهم لا
علي مثل الهوى ماينعشك ينشم
ومنو انه واصفك وانت نص الكون
بوصف ظلك علي..جبريل يتعذر
